Aallarnisaasut: Aggerlutik pinngortitaq misigiuk
Asimiinnermik nuannarisaqarluarneq suliffeqarfiliornermi aallarteqqammersumi Two Ravensimi tunuliaqutaavoq
Two Ravensimik pilersitsisut Adam Mike Kjeldsen aamma Thorlaj Skifte Nielsen ilisarisimalaaraanni tupaallaataanavianngilaq maanna misigisassarsiortunut angalatitsisunngornissaminnik takorluugartik piviusunngortimmassuk.
Pinngortitaq DNA-tut
Aallarnisaasut taakku marluk pinngortitami misigisartakkaminnik nuannarisalerujussuupput peroriartornerminnilu sisoraatit nutsallu teqqalasut sungiusimalluarlugit. Taakku Maniitsumi Aasiannilu peroriartorsimapput sunngiffimminnilu ikinngutitik ilagalugit maani Nuummi sisorarfissanik nuannarisaqarluartuullutik. Misigisartakkatik maanimiunut avataaneersunullu avitseqatiginnissutigerusuppaat, taamaattumillu suliffeqarfik Two Ravens pilersippaat, isumaqartoq tulukkat marluk.
Oqaluttuaq nuannersoq
Isumassarsiaannut tunuliaqutaasoq tassaavoq inuit pinngortitami angalaaqatiginissaat, eqqaamasassinniarlugit angerlarunillu misigisaminnik allanut nuannaarutaasumik oqaluttuarsinnaanissaat. Aallartiinnarlutik ukiuunerani angalaartitsinissaannut nalunaartorpassuaqarpoq. Aallaqqaammut apusiuserluni pisuttuarnerit ingerlappaat. Tamatumani Quassussuup qaavanut pisuttuartitsisoqarpoq isikkivik alakkarterneqarluni pisuttuarfigineqartorlu isorartulluni. Pisuttuartitsinerit Tupilak Travelimi, Guide to Greenlandimi aamma taakku namminneq nittartaagaanni tuniniarneqarput.
Pilersaaruterpassuit
Aallaqqaammut ukiuunerani angalaarnerit pilersaarutaasut tassaapput apusiuserluni pisuttuarnerit tupermi imaluunniit apummi oqquartami unnuinerit, arsarnerit ullorissallu qilaaralugit. Ukioq manna kingusinnerusukkut allarpassuarnik pilersaaruteqarput. Tamatumani Nuuk aamma Kapisilinni pisuinnarnut unnuisarfik aallaavigineqassallutik. Angalaarnissat suussanersut taakku marluullutik suli oqaatigisinnaannginnerarpaat, oqaatigaluguli tassaassasut pisuttuartitsinerit, umiatsiamik angalaarnerit, aalisariarnerit, sisoraaserluni angalaarnerit allarpassuillu pilersaarutaasut. Taakku marluullutik oqaatigaat pinngortitami periarfissat killeqanngitsut.
Annertusiartortitsineq
Taakku arlaannaalluunniit angallassisartutut suli ilinniagaqarsimanngilaq, taamaattorli inuunertik tamaat pinngortitami angalaartarsimallutik aamma Nuup timaa amerlanernit ilisimaneruaat. Taakku marluullutik soorlu Canadami misigisassarsiortitsilluni angallassisartutut ilinniagaqarusupput, ingerlatartilli aallartilluaqqaarusuppaat. Aallarnisarnerminni ikinngutiminnit arlalinnit ilaquttaminnillu ikiorneqarluarsimapput, ilitsersorneqarlutik, nittartagaliornerminni allatigullu tapersersorneqarlutik. Taakku marluullutik Two Ravensip saniatigut suliffeqarput, nikerartunik suliffeqarlutik, suliniutigisaminniillu tapersersorneqarlutik. Ingerlataminni pilersaarutiminni anguniarpaat marluullutik ukiut tulliuttut ingerlaneranni angallassisarnerminnik inuuniuteqalerumaarlutik.
Angalaarnerit tamanut naleqquttut
Adamip aamma Thorlakip neriuutigaat maani najugallit takornariallu angalatitsisarnerminni neqeroorutiminnik pisiumassasut. Minnerunngitsumik maani najugallit ukioq kaajallallugu misigisassarsiorlutik isumalluutinillu atorluaanissaannik isumassarsisikkusuppaat. Angallassinerminni angallassaminnut aamma nerisassanik mamarsaakkanik maanngaanneersunik sassaalliuteqartarput tamannalu aalajangersimasumik misigisassatut ilaatittarlugu.
Pinngortitaq kikkunnut tamanut ammavoq aamma angalaartitsisarnivut taamaattuussapput, suliffeqarfimmik piginnittut marluk Adam Mike Kjeldsen aamma Thorlak Skifte Nielsen taama erseqqissaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...