Aallarnisaasut isumaqatigiissusiorput
Ulluni marlunni kalaallit aallarnisaasut ukkataralugit ataatsimeersuartoqarnerani siunnersortinut isumaqatigiissutit aamma suleqatigiinnissamut isumaqatigiissutit nutaat anguneqarput.
- Ullut marluk soqutiginarluinnarput, tassani ilikkagaqartorujussuuvunga. Titartaasartoq aamma ilusilersuisartoq, Maria Kreutzmann, Aarhusimi inuussutissarsiortunut ulloqartitsinermi Nukigami aallarnisaasut ataatsimeersuarnerisa kingorna taama oqaluttuarpoq.
- Siunnersortitaarpunga, Kalaallit Nunaannut utinnginninni taanna ataatsimeeqatigissavara. Taamaattumik taamatut Atlantikup avannaa ikaarlugu akimut taamatut suleqatigiinnerput pitsaalluinnartoq isumaqarpunga.
Suleqatigiinneq ataatsimeersuarnermi sammineqaqattaarpoq. Aallarnisaasutut allanut taama inissisimasunut pilliuteqalaartarnissaq saqqummiisunit aamma malinnaasunit erseqqissaatigineqaqattaarpoq – taamatullu aamma aningaasaliisut aamma inuussutissarsiornermut siunnersortit aallarnisaasut pitsaanerpaamik ikiorniarlugit suleqatigiinnissaat.
Oqariartuut tamanna Juliane Henningsenip Arctic Circle Businessimi pisortap tiguaa:
- Klagsvigimi Íverksetarahúsidip suliniutinut aningaasaliisussarsiorluni tunngaviata atorsinnaaneranut aalajangersimasumi isumaqatigiissuteqarfigalugu Sisimiunut angerlassaannga. Savalimmiormiut aamma piginnaasanik ineriartortitsinermi suleqatigissavagut, Nukigamik suleqateqarnerput aamma ingerlatiinnassavarput, tassani qarasaasiatigut siuarsaanermut ataatsimoorfimmik aamma fablab-imik (tunisassianik ineriartortitsinermut laboratoriamik, aaqq.) pilersitsinissaq suleqatigiissutigineqarluni, Juliane Henningsen oqarpoq.
- Annertuumik attaveqaateqalerpunga. Nuummi Nerisami inuussutissalerisunut attaveqaatinut suleqatinut amerlanerusunut attaveqarpunga – Nuummilu Foodlabitsinnik atuerusuttunik amerlanerusunik attaveqalerpunga, Anne Nivika Grødem, Sermersooq Business Councilimi Nerisami inuussutissalerisut attaveqarfianni suliniummik ingerlatsisoq oqaluttuarpoq.
Misigisaq nuannerluinnartoq
Ataatsimeersuarnermik ingerlatsisoq, Nukigami pisortaq Morten Larsen, ulluni marlunni ataatsimeersuarneq eqikkarpaa:
- Oqaloqatigiinnerup qanoq ingerlanera aamma kikkut tamarmik annerusumik attaveqalernerat misigalugu nuannerluinnarpoq. Nutaanik ilisimasaqalersitsivoq, taamatullu aamma aallarnisaasunut tunisinissamut periarfissiilluni. FN-imi nunarsuarmi anguniagaanut nr. 17-imut aallarnisaasut siuarsaaqataanermut pingaaruteqartut uppernarsarparput, taanna kulturit aamma nunat killingi akimorlugit suleqatigiinnermik pilersitsinissamut tunngavoq, Morten Larsen, Sermitsiaq.AG-mut taama oqarpoq.