Aallarnisaasut avammut nioqquteqarnissamut piareertut

Kalaallit aallarnisaasut marluk atisanut ilisarnaat ataatsimoorussartik aqqutigalugit avammut nioqquteqarnermi niuerfinnut maanna piareerput. Tamanna nittartagaq nutaaq aqqutigalugu pilersinneqarpoq.

Inuit Quality Clothes of Greenland ullumikkut qulinik sulisoqarpoq. Nuummi pisiniarfimmi pisiniarfimmiut tallimat pisiniarfiullu aqutsisua, quersualerisoq, avammut tuniniaasoq piginnittullu marluk.

Inuit Quality Clothes of Greenland ilisarnaataavoq. Kalaallit atisaliaannut ilisarnaat ingerlalluartoq. Kisianni Kalaallit Nunaanni inunnut qulinut aamma suliffiuvoq.

Aviisi Sermitsiaq taama allappoq.

Tassani nioqqutissaatigineqartut ilarpassuinik tunisassiorneq nunani allani ingerlanneqaraluartoq, nioqquteqartoqarlunilu siammarterisoqartussaavoq, taakkualu tamarmik Nuummiit ingerlanneqartarput.

Canadami naapeqatigiinneq

Inuit Quality Clothes of Greenlandimik oqaluttuaq Canadami ukiut qulingajaat matuma siorna aallartippoq. Kalaallit pisiniarfinnik piginnittut marluk 2012-mi atisanik saqqummersitsinermut pisiniarlutik angalanerminni naapeqatigiipput, taamanilu marluullutik Canadamiut ukiorsiutinik kavaajaliaannik niuerfimmiillutik.

Taakkua tassaapput Dorthea Brinch Rødgaard, Qaqortumi pisiniarfiup Timimut piginnittua ,aamma Hanne Eva Kristiansen, Aasianni Sisimiunilu atisaarniarfinnik Anunimik piginnittoq. Pisiniarfiutilittut aallarnisaasuunermik pingaartitsisuupput, imalu aaqatigiilluartigisimapput ingerlatseqatigiiffik Inuit Quality Clothes of Greenland ataatsimoorussaq aallartinniarlugu isumaqatigiissimallutik.

- Nammineq tunisassiornissamik ataatsimoorussamik kissaateqarpugut – tamakkualu soorunami tassaassapput atisat kalaallit ilusilersugaannik ilaqartut. Taamaattumik oqaatigiortuukkavut tulleriiaaginnalerput, tassanngaannarlu aallartippugut, Dorthea Rødgaard oqaluttuarpoq.

- Aallarnisaasutut pigisaqarnermut ilaavoq eqqarsaammiit iliuuseqarnermut ungasittannginnera.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS