Aallarnisaasartut: Qularneq sorusussuseerutsitsisarpoq
Kalaallit aallarnisaasut tunniussassaqartaqaat, qanorli tamanna piujuartitsisumik atorluarsinnaaneripput Aarhusimi kalaallit aallarnisaasut isumasioqatigiinneranni sammineqarpoq
Aallarnisaasut kiisalu ilisimasallit 100-t, politikkerit inuussutissarsiortullu ataasinngorpat marlunngorpallu Aarhusimi Nukiga Erhvervsdageqartitsippat kalaallit aallarnisaasut sammineqassapput.
Isumasioqatigiinnermi aqutsisup, TV-kut tusagassiortup Lene Johansenip, aamma aallarnisaasuusup ataasinngornermi oqallinnissaq aallarnerlugu oqaatigaa:
- Kalaallit Nunaat oqaluttuassatsialaavoq, aallarnisaasartullu oqaluttuallaqqissuullutik, apeqqutaalerporlu qanoq ililluta kalaallit aallarnisaasarnerat pitsanngorsaaffigissaneripput?
Aallarnisaasartut pingaarutillit
- Aallarnisaasartut pingaaruteqartuupput, taakkuuppummi tulluussimaalersitsisartut, imminut naleqalersitsisartut najugaqarfinnilu mikinerusuni innuttaasunik ikiliartorunnaarsitsisartut, oqaluttuarpoq Aalborg Universitetimi ilisimatooq Lill Rastad Bjørst.
Aallarnisaasut arlallit assartuinermi akigititat ineriartornermut aporfiusutut oqaatigivaat, aallarnisaasorli Anita Høegh Sisimiuni Qiviuneersoq oqallinnermik annerpaamik pilersitsivoq, taanna isumaqarpoq aningaasaliiffigineqartarneq siunnersorneqatarnerlu kalaallinut aallarnisaasartunut naammattartoq.
Qulartarneq ajornartorsiutaavoq
- Aningaasat tapersersorneqarnerlu naammapput, siunissamili atugassarititaasussat nalugutsigit kinaluunniit
suliffeqarfitsinnut aningaasaliissuteqarusunnavianngilaq. Kangerlussuup siunissaa pillugu erseqqissumik ilisimatinneqartannginnerput suliffeqarfiutinnut ajorluinnarpoq, Anita Høegh Sulisitsisut pisortaannit Brian Buus Petersenimit taperserneqarpoq.
- Inussutissarsiortut akileraarutinut malittarisassanulluunniit akerliunngillat, piffissalli sivikitsuaqqap ingerlanerani qularnartunik malittarisassanillu nutaanik takkuttoqarsinnaanera annilaanngatigisarparput.
Ulluni marlunni isumasioqatigiinnermi kalaallit aallarnisaasartut ilisaritinneqarput, ilisimasallit saqqummiussaqarput oqallittoqarlunilu.