Aallarnisaaneq pisortanit ukkatarineqarpoq
Atuarfeqarfinni aallarnisaanerup aallunneqarnerulernissaa anguniarlugu inuussutissarsiornermi suliaqartunit aallunneqalerpoq
Fonden for Entreprenørselsskabimi siulersuisut marlunngormat pilersinneqarput, siulersuisuni 13-it ilaasortanngorlutik. Air Greenlandip pisortaanera Jacob Nitter Sørensen siulersuisuni siulittaasunngorpoq, suliniullu Namminersorlutik Oqartussat suleqatigalugu pilersinneqarpoq.
- Atuartut ilinniagaqareernermi kingorna aallarnisaanissamut periarfissaqarluarnissaat anguniarlugu una pilersinneqartoq pissusissamisoorluinnarpoq, siulittaasunngortoq Jacob Nitter Sørensen oqarpoq.
- Atuartut soqutiginartittorujussuuaat aammali ilinniartitsisut piginnaasatik taamaasillutik ineriartorteqqissinnaalissavaat, ,allarnisaaneq pillugu suliaqarnermi atuartut qanoq piumassuseqarsimatiginersut takoreerlugit oqarpoq.
Aningaasaateqarfik aningaasanut inatsimmit 1,4 million koruuninik aningaasalerneqarpoq, suliassanulli pingaarnersaavoq Kalaallit Nunaanni amerlanerpaanik suliffissaqalersinnaanissaa.
Tulluarsaanissaq
- Suliniummut Air Greenland aningaasaliivoq, tassunga atatillugu akeqanngitsumik angalasoqarsinnaalluni. Inuusuttut inuussutissarsiornermiilernissaat suliffeqarfittut pisariaqartinneqarpoq, tassani aallarnisaanermut piginnaasaqarnissaat aamma pingaaruteqarluni, Jacob Nitter Sørensen oqarpoq.
Danmarkimi suliniut misilittagaqarfigineqarluartoq oqaatigaa. Kalaallit Nunaannut suliniutip tulluarsarnissaa suliassanut tullinnguuppoq.
- Kalaallit Nunaata nammineerluni aningaasarsiornissaanut aamma ineriartornissaanut aallarnisaaqataassaaq, Jacob Nitter Sørensen oqarpoq.