Piniarneq aallarniarnerlu pillugit inatsisip Inatsisartuni inissinneqaqqaartussaq kinguartinneqarpat kinguartinneqanngikkaluarpalluunniit - aallaasit pillugit inatsimmi allannguutit siuarsarniarsariniaraat Sermitsiaq.AG-p marlunngornermi oqaluttuaraa.

Aalisarnermut piniarnermut naalakkersuisup, Karl Tobiassenip, ullumi qiimmatsaqqalluni oqaluttuaraa, inatsit Inatsisartut 23. maj suliarisimagaat.

- Inatsisartuni amerlanerussuteqartut inatsimmi aalajangersakkat pingaarutillit akuerimmatigit nuannaarutigeqaara, taanna oqarpoq.

Inuussutissarsiornermut allagartaqarniaraanni 15-inik ukioqarnissaq piumasaqaataalissasoq, tamanna ilaatigut isumaqarpoq, meeqqallu 12-inik ukioqalereersimasut uumasunik pisassiissutigineqartunik piniarnermut inersimasunik ilaqarlutik peqataasinnaassapput.

Aallaasit pillugit inatsit nutaaq sukatigarlu

Aallaasit pillugit inatsisip nutaat akuerineqannginnerani, piniarnermut aallarniarnerlu pillugu inatsimmi allannguutit suliareqqaarneqarnissaat Inatsisartut pingaartissimavaat, taamaanngippat inuit 15-it inorlugit ukiullit piniarnissaat inerteqqutaassammat.

Tassami aallaasit pillugit inatsisip sukaterneqartup, aallaasinik nalinginnaasunik tigummiaqarniaraanni 15-inik ukioqalersimanissaq siunnersuutigimmagu, taamatullu aamma aallaasit inissinneqartarnissaannut malittarisassaqassammat.

Ullumikkut aallaammik tigummiarniaraanni 12-inik ukioqalersimanissaq piumasaqaataavoq, aallaasit pillugit inatsisip nutaaq sukateriffigineqaraluartoq, meeqqat 12-15-inik ukiullit siunissami inersimasunik peqateqarlutik aallarniarsinnaanissaat politikerit arlallit kissaatigaat.

Maannalu piniarnermut aallaaniarnermullu nalunaarutini nutaani akuerineqaqqammersuni tamanna siunnersuutigineqarpoq. Maanna aallaasit pillugit inatsisip allanngorneqarnissaa tullinnguuppoq, taanna Naalakkersuisut qinigaaffimmi matumani akuerineqarnissaa anguniarsariniarpaat.