Aallaasersortoqartoq: Politiit Tasiilami meeqqeriviup eqqaaniipput
Pinerluuteqartoq marlunngornermi ualikkut Tasiilami majuartaatip eqqaani aallaammik igippoq. Innuttaasut sumiiffimmut qanillinnginnissaannut politiit qinnuiginnipput.
Tasiilami majuartaatip tungaani aallaammik igittoqarsimasoq Kalaallit Nunaanni Politiit nalunaarfigineqarput. Politiit ataasinngornermi nalunaaqutaq 13-p qaangilaarnerani tusagassiuutinut nalunaarummi taama allapput.
Pinerluuteqartoq majuartaatip tungaanut qaqqamut ingerlasimasoq, politiit ilisimatitsipput, taamaammat innuttaasut majuartaatip tungaaniissanngitsut qinnuigineqarput.
- Meeqqerivimmut Pingaeeqqad-nut sumiiffiup qanittuaniittumut meeqqanik aallerniaraanni, innuttaasut biilerlutik aallernissaat politiit siunnersuutigaat, innuttaasullu tamarmik sumiiffimmi politiit peqqussutaannut malinnissasut qinnuigineqarput.
Paasissutissaateqaraanni politiit attaveqarfigineqassapput
Politiit oqarnerat naapertorlugu meeqqerivik paasitinneqareerpoq, inuillu illup iluaneeqquneqarput.
Politiit meeqqeriviup eqqaaniillutillu illoqarfimmi sumiiffinni allaniipput, sumiiffimmilu assiaqusersuisoqassaaq, taakkulu innuttaasunit ataqqeqquneqarput, tusagassiuutinut nalunaarummi taama oqarput.
Innuttaasut illoqarfimmi sumiiffinni allaniittut maannamut toqqissisimannginnissamut pissutissaqanngitsut politiit nalilerpaat, ajoqusertoqarsimaneranillu politiit nalunaarfigineqarsimanngillat.
Aallaasersortoqarneranut tunngasumik takusaqarsimagaanni tusagaqarsimagaanniluunniit politiinut 70 14 48-mut sianertoqassasoq qinnuiginnittoqarpoq.