Aallaasersortoqarnerata kingorna: Qulimiguulik mikineq atorneqalerpoq – allamullu minnissamut qinnuteqartoqarpoq
Pingasunngornermi pisup kingorna, ilaatigut qulimiguullip aallaammik eqqorneqarnerata kingorna, Air Greenlandip qulimiguulik tallimanik ilaasoqarsinnaasoq atulerpaa, Kujataanilu angallassineq aaqqissuuteqqinneqarpoq.
Pingasunngornermi aallaasersortoqarnerata kingorna Air Greenlandip ilaasunik angallassinini aaqqissuuteqqillugu suliaraa.
Qulimiguulik H155 pisup kingorna atorneqarsinnaajunnaartoq, timmisartortitseqatigiiffik ilisimatitsivoq, tassani angut Narsami heliportimi qulimiguullip tungaanut eqqarpoq.
Taamaammat Air Greenlandip qulimiguulik mikineq AS350 tallimanik ilaasoqarsinnaasoq Kujataani atulerpaa.
Allamik miffissaqarnissaq utaqqigaat
Qulimiguulilli maannamut Narsamut missinnaanngikkallassaaq, heliportip ungasinngisaani miffiusinnaasumut akuersissummik qinnuteqaatip akineqarnissaa suli utaqqineqarmat. Air Greenland tusagassiuutinut nalunaarummi taama allappoq.
H155 miffissamik assiisimammat aamma pisup kingorna misissorneqaqqaassammat, timmisartortitseqatigiiffik Sermitsiaq.AG-mut taama ilisimatitsivoq.
Timmisartortitseqatigiiffik angallatinik illoqarfiit Nanortallip, Qaqortup aamma Narsap akornanni angallassigallartussanik attartornialeruttorpoq.
- Narsarsuarmi umiarsualivimmi siku suli issuallaarmat angallatinillu tikinneqarsinnaanani, Narsarsuarmut angalanissat tamarmik qulimiguulimmik pissapput. Qulimiguulimmik suli ataatsimik Narsarsuarmiittussamik pissarsiorpugut, apeqqutaavorli qulimiguulimmik atunngisassaqarnersoq, Air Greenland allappoq.
Sikumik aserorterisoqartoq
Air Greenlandip nalunaarutaa naapertorlugu, Issittumi Sakkutooqarfik Tunulliarfimmi sikumik aserorterinini ingerlatiinnarpaa, imaatigullu aamma Narsarsualiaassisalernissaq Air Greenlandip neriuutigaa.
- Taamatut allannguisariaqalernerput ajuusaarutigaarput. angalasussallu qinnuigaavut e-mail/sms -ilu alaatsinaaqqullugit, Air Greenland allappoq, ingerlatsiviullu atuisunik sullissinerani nalinginnarmit utaqqinarnerusinnaassasoq malugeqquneqarpoq.