Aalisartuullunilu politikkeri: Ajorluinnarpoq
Royal Greenland aalisakkanik uumatitsivinniittunik aallinngimmat, Sisimiut eqqaani aalisartup saarullittani tamaasa annaasimavai. Aslak Jensen Siumumeersoq isumaqarpoq, tamanna ajorluinnartoq, erseqqissaatigaalu pisoq piujuartitsinerunngitsoq.
Kitaata sineriaani bundgarnersorlutik aalisartut katillugit 200-t uumatitsivinni saarulliuteqarput, saarulliit Royal Greenlandip umiarsuaataanut tunineqartarput. Namminersorlutillu Oqartussat suliffeqarfiutaat naapertorlugu tamanna ingerlalluartupilussuuvoq, suliffeqarfiup sapaatip akunnerani matumani nalunaarutigisimavaa, bundgarnersorluni aalisarnermi saarullinnik uumatitsivinniititsisarneq iluatsilluarneqarsimasoq, taamatullu aalisartarneq soqutigineqaleraluttuinnartoq.
Taamatulli isigineqarnera aalisartuullunilu Siumut sinnerlugu inatsisartuni ilaasortap Aslak Jensenip isumaqatiginngilluinnarpaa.
- Royal Greenlandip bundgarnersorlutik aalisartut 30-nngortillugit amerlerusuppai, naak umiarsuaq tunitsiviusartoq ataasinnaagaluartoq. Aalisartut qulit piffissami kingullermi pisaminnik annaasaqarsimapput. Tassa saarulliit 300 tonsit annaaneqarsimanerannut tamanna naapertuuppoq. Tamanna tunngavigalugu aalisartunik amerlanerulersitsiniarneq piujuartitsinerusutut takujuminaatsippara, Aslak Jensen Sermitsiaq.AG-mut oqarpoq.
Pisassiissutit killeqartut
Sineriammut qanittumi saarullittassat ukioq manna 21.000 tonsiupput. Pisassiissutit killeqarmata, aalisartut pisaminnik tunisaqartarnissartik pinngitsoorsinnaanngilaat. Nunami piujuartitsilluni aalisartoqassappat, bundgarnersorlutik aalisartut tamarmik toqqissillutik aalisarsinnaassagunik uumatitsivinni saarulliuteqartariaqarput, Aslak Jensen erseqqissaavoq.
- Piujuartitsisumik aalisassagutta, piat tunineqarnissaat qulakkeersinnaanngikkutsigu taava aalisartariaqanngilagut. Royal Greenlandi umiarsuarmik ataasiinnarmik tunitsiveqartitsissappat toqqissisimananngilaq, taanna nangilluni oqarpoq.
Siumut Demokraatillu ajornartorsiut pillugu aalisarnermut Naalakkersuisumut erseqqissaassuteqarlutik saaffiginnissimapput. Aslak Jensenip aamma erseqqissaatigaa, Naalakkersuisut naalakkesuisooqatigiinnissamik isumaqatigiissutaanni allassimasoq, nunami aalisarneq piujuartitsisumik ingerlanneqassasoq.