Aalisartut: Nipisanniarneq ajorluinnarpoq
Tunisinermi akit appasippallaarneri pissutigalit aalisartorpassuit nipisanniarusunngillat.
Ukiup ataatsip matuma siorna umiatsiaararsortut ilaasa, ukiumut isertitaasa amerlanerpaartaat nipisanniarnermiik isertinneqartarput. Tamannali maanna coronap ajornartoortitsineranik peqquteqartumik akornuserluinnarneqarpoq.
Aviisi Sermitsiaq taamatut allappoq.
Ukiormi manna nipisanniarnermi tunisinermi akit siornamut naleqqiullugit appasinnerutigipput, umiatsiaararsortut amerlasuut nipinniarniaratik aaliangiussimallugu. Aammali aqutsiveqarfinnut pisassiissutit assigiinngitsuuneri pissutaalluni, sumiiffiit ilaanni piffissaliussaq tamakkerlugu aalisarneq ingerlanneqarsinnaanani.
Pisassiissutit qaffanneqarsimasut
Ukioq manna pisassiissutit tamakkiisut 1.229,4 tonsiupput, siornalu 1.159 tonsiullutik. Siornali immikkut ittumik pisassiisoqarneratigut pisassiissutit 204 tonsinik ilaneqarput.
Tunisinermi kilomut akigitinneqartussaq KNAPK-p Royal Greenland A/S-illu akornanni isumaqatigiinniutigineqarmat 22 koruuniussasoq, taassumalu qaavatigut 2 koruunimik tapeqartinneqassasoq isumaqatigiissutigineqarpoq, kiisalu aqutsiveqarfinni Royal Greenlandip tunitsiveqarfigisaani nipisat suai qanoq amerlatigisut tunineqassanertut ilanngullugu isumaqatigiissutigineqarpoq. Piffissamili kingullermi nipisat suaannik tunisinermi kilomut akigitinneqartoq 13 koruunimut apparneqarpoq, taannali qaavatigut 2 koruunimik tapeqartinneqarpoq.
Akerlerineqangaatsiartoq
Ukioq manna nipisanniarnerup aqunneqarnera, piffissamilu akit apparneqarnerat, sinerissami umiatsiaararsortunit sakkortuumik akerlerineqarpoq.
Nipisat suaat MSC-mik meqqeqartinneqarput, siornalu tunisinermi akitiginneqartoq kilomut 40 koruunit sinneqarpoq.
Ilanngutassiaq tamaat Sermitsiami atuaruk - ugguuna iserfigisinnaavat: