Aalisartut siulittaasuat: Naammaleqaaq!
Tasiilami aalisartut piniartullu aalisakkeriviup tunisisinnaanerullu matoqqaneranni ajornartorsiuteqarput. Arctic Prime Fisheriesip marlunngornermi ilisimatitsissutigaa, aalisakkerivik ammaqqinneqartoq.
Tunumi aalisakkerivituaq matuneqaraangat, sumiiffimmi aalisartunut kingunerlutsitsisarpoq. Tasiilami aalisartut piniartullu peqatigiiffiaanni siulittaasup Frede Kilimep aalisartorpassuarnut attanneqarsinnaasumik aaqqiissuteqartoqarnissaa pillugu politikkerit Arctic Prime Fisheriesilu iliuuseqaqqullugit ataatsimiinnerni arlalinni oqaatigisarsimavaa, aalisartummi Kuummiuni tunitsivik taamaallaat isaatitsissutigisinnaammassuk.
AAMMA ATUARUK: Kuummiuni aalisakkerivik matoqqagallartinneqartoq
Aalisakkerivik sapaatip akunnerini sismangajalluinnarni matoqqareersoq, aalisartunut kiisami nutaarsiassatsiaqalerpoq.
Sermitsiaq.AG-p marlunngornermi Arctic Prime Fisheries attavigisimavaa, tassani tusarusullugu aalisakkerivik qaqagu ammaqqinneqarniarnersoq. Pisortaaneq siullermik oqaaseqarsinnaannginnerarpoq, nalunaaquttalli akunnialui qaangiummata ilisimatitsissutigineqarpoq, aalisakkerivik ullumimiit ammaqqinneqarsimasoq.
- Arctic Prime Fisheries ApS-ip ilisimatitsissutigissavaa, Kuummiuni aalisakkerivik ullumi aggustip pingajuani tunitsivigineqaqqissinnaanngorlugu aalisakkanillu suliaqarfiusinnaanngoqqillugu ammarneqartoq (...) Aalisartut taamaalillutik pisaminnik Kuummiuni aalisakkerivimmut tunisaqaqqissinnaanngorput sulisullu suliaminnik ingerlatsitseqqissinnaanngorlutik, suliffeqarfik Sermitsiaq.AG-mut ilisimatitsivoq.
Kingunerluuteqartoq
Siulittaasup Frede Kilimep oqaatigaa, ammaqqinneqarnissaa piffissanngortoq.
Sapaatip akunnerani qaangiuttumi Frede Kilimip ilaasortaasa ilaat siullersaalluni innaallagissamik qamitaasimavoq, sulilu amerlanerit qamitaanissaat ernummatigineqarluni.
Siulittaasup oqaatigaa, innaallagiaq qaminneqarsimappat, taava aamma nerisassanut aningaasassaqartitsisoqarnavianngilaq. Tamatumalu kinguneranik ilaqutariit meerartaat atugarliornerulersinnaapput, taamalu naggataatigut angerlarsimaffiup avataanut inissinneqarsinnaallutik - tamannalumi kissaatigineqarnavianngitsoq ataatsimiinnermi oqaatigineqarpoq.
Tusaaneqanngitsutut misigisimasartut
Tunisisinnaaneq taamalu kaaviiaartitat annertussusaat, ilaqutariinnik pilersuisup ukiup sinneranut aningaasatigut imminut napatissinnaaneranut pingaaruteqarluinnartuupput, taakkumi anorlertarnera silarluttarneralu pissutigalugit annertunerusumik aalisariarsinnaasanngillat/piniariarsinnaasanngillat.
Frede Kilime nalinginnaasumik eqqissisimasuuvoq, tunumili ilaasortarisami atugaasa ullormiit ullormut ajorsiartuinnavinnerat pissutigalugu maanna nilliassuteqarpoq.
Najukkamili ajornartorsiutinik saqqummiussisoqartarnera pimoorunneqartanngilaq. Aalisartut aningaasaqarnikkut inissisimanerat ikiorsiiffiginiarlugu susoqarsimanngilaq, suliassamulli aaqqiissutissarsiorluni suliaqarnerup kinguartittuarneqartarneratigut utaqqilussinnartitaasutut misigisarsimapput.