Skip to main content

Aalisartut politikerinik naveersipput

Inuit 250-it missaat saarullinnik tunisinermut akinik iluarisimaarinninnginnertik takutinniarlugu katersuupput, pingasunngornermilu akerliussutsimik takutitsinerminni politikerit neriorsuilussinnarsimasutut taallugit.

Nuummi nalunaaqutaq 12.30 sila aliannaalluinnarpoq, anorsaarluni issiganilu.

Aalisartut ullumikkut aalisariarsimagunanngillat, imaluunniit aalisartut piniartullu ullorortinnagu illoqarfimmut utersimapput. Inuimmi 200-t sinneqarsorinartut Nuummi katersortarfiup silataanut katersuussimapput, Inatsisartut allattoqarfiata tungaanut ingerlaaqatigiinnissamut piareersimallutik.

Aalisartut piniartullu atasoqarlutik gummilersimallutillu, tapersersuisut allat, KNAPK-p immikkoortortaqarfia Nuummilu sunngiffimmi aalisartut peqatigiiffiat ataatsimoorlutik, KNAPK-p nuna tamakkerlugu akerliussutsimik takutitsinissaanut piareersimapput. Akerliussutsimik takutitsinermut saarulliit tunineqarnerini akii apparneqarnerat naammagineqanngitsoq oqariartuutigineqarpoq. Nuummi akerliussutsimik takutitsineq nal. 12.45 ingerlaaqatigiinnermik aallartippoq.

KNAPK Sermitsiaq.AG-mut ilisimatitsivoq nunatsinni kattuffiup immikkoortortaqarfiini 70-iusuni 14-t akerliussutsimik takutitseqataasut. Kalaallit Nunaata Politiivi nalunaaruteqarput akerliussutsimik takutitsisoqarnera eqqissisimasumik ingerlaqqullugu politiit nakkutilliissasut.

Neriorsuutit sualuttut

- Salloqittagaakatappugut!

- Pissutsit aatsaat taama ajortigaat, inuuniarneq aatsaat taama ilungersunartigaaq!

Ingerlaaqatigiinnermi oqariartuutit arlallit saqqummiunneqarput. Akerliussutsimillu takutitsisut ingerlaarneranni biilit ingerlasinnaanissaat politiinit qulakkeerniarneqarpoq.

Akerliussutsimik takutitsisoqarnerani aqqusineq H.J. Rinksvej politiinit assersorneqarsimavoq, akerliussutsimik takutitsisut apuutilernerminni aqqutissaqarluarnissaat pillugu. Nalunaaqutaq 13.00-inngorluinnartorlu akerliussutsimik takutitsisorpassuit, angutit, arnat meeqqallu, Namminersorlutik Oqartussat Inatsisartullu akornanni biileqannginnersamut apuupput. Naalakkersuisut Inatsisartunilu ilaasortat oqariartuutinik tusarnaarnissamut piareersimallutik qeqqissimapput.

Akerliussutsimik takutitsisunit qineqqusaarnermi neriorsuutigineqartartut, sulilernermi puiguunnarneqartarnerat aamma oqariartuutigineqarpoq.

- Qineqqusaarnermi naleqarnerulersitsinissaq neriorsuutigineqartuartoq, iserlusilu puiguunnartarparsi! Suaartoqarpoq.

Takusiuk tunuliaqutagut qanoq amerlatiginersut

KNAPK-mi siulittaasup Nikkulaat Jeremiassenip oqalugiarnermini arlaleriarluni oqaatigaa akerliussutsimik takutitsisut, Nuummiinnaanngitsoq sinerissamili aamma, amerlalluinnarnerisa takutikkaat innuttaasut tunisinermi akinut tunngatillugu naammagittarsinnaajunnaavinnerat.

KNAPK-p Naalakkersuisut isornartorsioreerpai uninngaannarnerarlugit, naak Royal Greenlandip saarulliit kilomut akiinik appaagaluartorluunniit.

- Akit kipiluttuinnarluinnarneri naggataatigut ilaqutariit isertitaannut inuuniarnerannullu kingunipiloqartussaavoq. Kilomut 5 koruuni akiligassaasunut pisiassanullu naammanngerujussuarpoq, Nikkulaat Jeremiassen politikerinut oqalugiarpoq.

Politikerit tusarnaartussaaneranni akerliussutsimik takutitsisut neriorsuilussiinnartoqarsimanera, innuttaasunut soqutigittaatsoqarnera nunatsinnilu inuussutissarsiutit pingaarnersaannik sumiginnaasoqarnera nilliaatigaat.

- Arlaleriarluta akisussaasumik oqaloqateqarumasarpugut, ulloq mannali tikipparput nikeriartoqarsimanngitsoq. Takoriarsiuk tunuliaqutagut qanoq amerlatiginersut. Eqqaasitsissutigissuara KNAPK-mit oqaloqatigiinnissat ammaffigigatsigit, aalisartunut piniartunullu inuuniarnikkut aaqqiissuteqartoqarnissaa anguniarlugu,  KNAPK-mi siulittaasoq Nikkulaat Jeremiassen oqarpoq.

Akerliussutsimik takutitsisut naammassilerneranni piniarnermut aalisarnermullu Naalakkersuisoq, Kim Kielsen (S) Inatsisartunilu ilaasortat oqalugiarput. Akerliussutsimik takutitsineq nal. 14.00 naammassivoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER