Aalisartut piniartullu arfineq-pingasut nersornaaserneqartut
KNAPK-p ataani Niels Carlo Heilmannip aningaasaateqarfianit aalisartut piniartullu arfineq-pingasut nersornaaserneqarput. Nersornaaserneqartut ilaat imaani ajunaalersumik annaassisimavoq.
Aalisartut piniartullu ullumikkut ullorsiorput.
Ulloq malunnartinniarlugu KNAPK-mit naalagiartoqarpoq, oqaluffik Hans Egedellu eqqaani eqqaassutissamut kransemik ilisisoqarluni.
- Imaatigut ajunaartoqartillugu ilaqutaasunut aliasunnartassaqaaq. Ullumikkut aamma taakku, imaani annaasimasagut eqqaaniassavagut, KNAPK-mi siulersuisuni ilaasortaq Aslak Jensen eqqaaniaanermi oqarpoq.
Naalakkersuisut siulittaasuat, Múte B. Egede, politikerit suliaqartullu allat aalisartunik piniartunillu aamma ullumi pilluaqqusipput:
- Aalisatut, piniartut ilaquttasilu ullorsiornissinni pilluaritsi. Qujanaq inuussutissanik pinngitsoorsinnaanngisatsinnik pilersortuarlutalu nunatsinnik napatitseqataalluarassi, Múte B. Egede Facebookimini allappoq.
Nersornaatit tunniunneqartut
Ullumi eqqaaniaasoqaannanngilaq. Aammali KNAPK-mi ilaasortanut, aalisarnermi piniarnermilu immikkut malunnaatilimmik suliaqartunut nersornaasiisoqarpoq.
Niels Carlo Heilmannip Aningaasaateqarfianit aalisartut piniartullu, inuussutissarsiornerminni ikiuulluartunut, inuusuttunik ilinniartitsilluartunut najukkaminnilu malunnaateqarluartunut nersornaatinik tunniussisoqarpoq.
Ukuupput:
- Aqqalunnguaq Nielsen, Qeqertaq Ilulissat eqqaani
- Apollo Egede, Nuuk
- Johannes Eskildsen, Tasiuaq Upernaviup eqqaani
- Paulus Christensen, Tasiusaq Upernaviup eqqaani
- Mikael M. Johsen, Qeqertarsuatsiaat Nuup eqqaani
- Ole P. Olsvig, Naajaat Upernaviup eqqaani
- Åge Hammeken Danielsen, Ittoqqortoormiit
- Jens Petersen, Naajaat Upernaviup eqqaani
Jens Petersen, Upernaviup eqqaani Naajaaneersoq inummik imaani ajunaalersumik annaassisimanera pillugu nersornaaserneqarpoq. Naajaani najukkami immikkoortortaqarfik KNAPP innersuussinerminut tunngavilersuutigaa sikukkut nakkartoq annassimammagu, Jens Petersen nersornaaserneqartariaqartoq.
Niels Carlo Heilmannip aningaasaateqarfianit nersornaat nersornaaserneqartunut tamanut immikkut 7.000 koruuninik aningaasartaqartinneqarpoq.
Aslak Jensen ilisimatitsivoq KNAPK Nuummi Pilutami nal. 13.00 kaffellissasoq, ilaasortamillu nersornaasiineq nal. 14.00 pissasoq.