Aalisartut navialinerarluni kalerrisaarisoq

Umiatsiaararsorluni aalisartoq ataasinngornermi Ilulissat kangerluaniit nalunaarpoq ajornartorsiorluni iluliarsuarnit marlunnit kiggigussaalernerarluni. Timmisartumik angallatinillu annaassiniartoqarpoq.

Ajornartorsiulerluni nalunaarut politiinut anngunneqarpoq ataasinngornermi nalunaaqutaq 20.00-ip missaani taamaasineranilu anorlerlunilu isikkiviluppoq. Aalisartoq Aasiaat Radio aqqutigalugu kalerrisaarisimavoq radiokkulli attaveqarnerat kipisimavoq.

Kalerrisaariunnaarpoq
Angallatit marluk erngerlutik ajornartorsiuffittut nalunaarutigineqartup tungaanut aallarput timmisartorlu qulimiguulik nalunaaqutaq 21.45 ujaasiartorluni aallarpoq.

Angallatilli timmisartorlu aalisartumik ajornartorsiortumik siumugaqanngillat.

- Nalunaaqutaq 22.34 politii Aasiaat Skibsradio aqqutigalugu nalunaarfigineqarput angut siusinnerusukkut nalunaarnerartoq attaveqaqqissimasoq ikiorneqarnissamik pisariaqartitsiunnaarluni. Angut kinaanerminik taasinngilaq politiinillu oqaloqatigineqarusunnani, Qaasuitsumi politiit pisortaat Aqqaluk Petersen nalunaarpoq.

- Pisimasoq manna tunngavigalugu politiit ilungersortumik eqqaasitsissutigaat ajornartorsiulernermi eqqortunik ajornartorsiorneq pillugu paasissutissiisarnissaq aammalu ajornartorsiorneq politiinut nalunaarutigineqartariaqartoq, Aqqaluk Petersen oqarpoq.

Politiit maanna isumaliutigaat pinerluttaalisitsinermi inatsit malillugu angut nalunaartoq malersorneqassanersoq.