Aalisartut aasarissinerani nutaarsiassaataat nuannersoq Pinngortitaleriffimmit qiimmattaatigineqanngitsoq

Qeqertarsuup Tunuani qalerallit ukiut kingulliit amerlasuut ingerlaneranni pisarineqartut tulaanneqartullu aatsaat taama amerlatigipput. Aalisartulli nuannaarnerat Pinngortitaleriffimmiit qiimmattaatigineqanngilaq.

Qeqertarsuup Tunuani qaleraleqassuseq, ukiut kingulliit biologit aalisartullu akornanni isummat aporaannerannik pilersitsiffiusarpoq. Ukiorlu manna pisat amerlanerulersimanerat, qalerallit amerlanerulersimanerannik peqquteqanngitsoq, Pinngortitaleriffimmiit oqaatigineqarpoq.

Upernajaarnera aasarissaarneralu Qeqertarsuup Tunuani sinerissap qanittuani aalisartunut qaleralinniartunut pitsaasumik atugassaqartitsivoq. Ukiut kingulliit marluk qaleraleqassutsip pitsaannginnera, Qeqertarsuup Tunuani qaleraleqassutsimut ernumalersitsisimagaluartoq, maanna nuan­naarnermik siunissamullu isumalluarnermik taarserneqarpoq. Ukiummi kingullit ingerlaneranni qalerallit pisarineqartut aalisakkanillu suliffissuarnut tulaanneqartut malunnaatilimmik amerleriarput. Ukioq manna qaammatini siullerni arfinilinni, qalerallit ilaatigut kangerlunni amerlanerulersimasut, aalisartuniit oqaatigineqarpoq – taamaaginnarnissaalu naatsorsuutigineqarpoq. Ukiut marluk matuma siornatigut Qeqertarsuup Tunuani qalerallit ikileriarujussuarnerat ilaatigut aalisapilunnermik pissuteqarsimasinnaasoq, Pinngortitaleriffimmi biologit taamanikkut naliliipput.

Biologilli taamatut eqqoriaasimanerat kukkunerusimagunartoq, Ilulissani aalisartut piniartullu peqatigiiffiannit IAPP-mit oqaatigineqarpoq. Ukiorli manna pisat amer­­lanerulersimanerat, qalerallit amerlanerulersimanerannik peqquteqanngitsoq, taamaattumillu persuarsiornissamut pissutissaqanngikkallartoq, Pinngortitaleriffimmiit oqaatigineqarpoq.

Kangerlunni qalerallit amerlanerusut

Ilulissani aalisartut piniartullu peqatigiiffianni siulittaasoq, Johan Villadsen, 32-fodimik aalisariutaateqarpoq, angallallu 111 tonsit missaannik pisassinneqarnikuuvoq.

Ukiorli Ilulissat eqqaa sikorpiarani imaatigut angallaviummat, ima qaleraleqartigaaq, qaammatit marluk missaasa ingerlanerinnaani 82 tonsit, Johan Villadsenip angallataanit pisarineqarlutik.

– Maannakkut arriitsumik aalisarnerput ingerlapparput. Pisassavulli nungukkaangata angallatit allat pisassaannik attartorsinnaasarpugut, taamaattumik ukiup sinnerani aalisarnissarput naatsorsuutigaarput, taanna oqarpoq.

AllaaserisaqtamakkerluguaviisiSermitsiamiatuarsinnaavat. Aviisiuaniataanipissarsiarisinnaavat:

Powered by Labrador CMS