Aalisartup qineqqusaartup Kujataani sinerissap qanittuani aalisarneq aannaateriassavaa

Nanortalimmi umiatsiaararsortunut inuussutissarsiornikkut atugassarititaasut aatsaat taamak ilungersunartigilersimasut, umiatsiaararsortoq Kommune Kujallermi kommunalbestyrelsimut qinigassanngortittoq oqarpoq.

Nanortalimmi aalisartut piniartullu inuussutissarsiornikkut atugaat aatsaat taamak ilungersunartigilersimasut, tamannalu silaannaap pissusaata allanngoriartorneranik, saarulliit sinerissap qanittuani takkusimaarpallaannginneranik, kiisalu aalisakkanut suliffissuarmut aalisakkat allat saarulliunngitsut tunineqarsinnaannginnerannik, peqquteqartoq, kommunalbestyrelsimut qinigassanngortittoq, Ole Larsen, Inuit Ataqatigiit, oqarpoq.

Aviisi Sermitsiaq allappoq.

Tamannalu qaangerneqassappat umiatsiaararsortut angallateerarsornermut ikaarsaartinneqartariaqartut, Ole Larsen, Nanortalimmi Inuit Ataqatigiit immikkoortortaanni aamma aalisartut piniartullu peqatigiiffianni siulittaasuusoq, isumaqarpoq.

Sikorsuaqassaajusattoq

Kujataani ukiut kingulliit sikorsuaqassaajusannera, aalisarnermillu inuussutissarsiuteqarnerup kigaappallaartumik ineriartortinneqarnera, aalisartut piniartullu aningaasarsiornerannut annertuumik sunniuteqarnerlussimavoq.

Nammineerluta malugisinnaasagut takusinnaasagullu naapertorlugit immaq kissarnerulersimavoq, tamannalu kangerluit sikussaajusannerannik ilaatigut kinguneqarpoq.

Sikorsuilli Tunumiit Nunap Isua uiarlugu Kujataanut ingerlasartut maanga takkusissaajusalluinnarnerat aamma annertuumik eqquinerluppoq, Ole Larsen oqarpoq.

Aviisimi Sermitsiami atuarnerusinnaavutit. Aamma aviisimi atuarsinnaavatit kommunini allani qineqqusaarutit pillugit allaaserisat:

Powered by Labrador CMS