Aalisartunut piniartunullu Naalakkersuisut politikkiat KNAPK-p isornartorsiorpaa

Pisaqarsinnaaneq ajornarluinnartillugu aalisartut piniartullu immikkut ikiorserneqassanngitsut Naalakkersuisut nalunaaruteqarsimapput. Tamanna KNPK-p naammaginngilluinnarpaa.

Naalakkersuisut aalisartunut piniartullu misiginneqatiginninnermik paasinninnermilluunniit takutitsinngillat sila pissutaalluni pisaqarsinnaannginneranni aningaasatigut ikiorsiiumannginnamik.

Naalakkersuisut aalajangernerat KNAPK-p sakkortuumik isornartorsiorpaa.

- KNAPK siusinnerusukkut periutsit naapertorlugit immikkut ittumik pisoqartillugu immikkut ittumik ikiorsiiffigineqarnissamut qinnuteqarpoq, tassami piniartut aalisartullu piffissami sivisuumi isertitaqanngillat. Tamanna Naalakkersuisuniit isiginiarneqanngilaq, tassami piniartut aalisartullu arlaatigulluunniit misiginneqatigineqanngillat imaluunniit paaserusunneqaratik, KNAPK-mi siulittaasoq Nikolaj Jeremiassen tusagassiorfinnut nalunaarummi allappoq.

Pisassat qaffasikkaluartut naammagittaatsut

Naalakkersuisut aalisartunik piniartunillu tapersersuinnginnerannik takussutissaqarnera KNAPK-p allaganngorlugu takutippaa. Qilalukkanik qernertanik qaqortanillu amerlanerusunik pisassaqartitsinissamik itigartitsisimanerat, piniagassallu ilaannik sivisunerusumik piniartoqarsinnaanerannik qinnuteqaatit akuerineqarsimannginneri ilaatigut assersuutigineqarput.

Qilalukkat qernertat qaqortallu aappaagu pisarineqarsinnaasut saqqummiunneqaqqammerput, pisassiinermilu biologit innersuussinerat qaangerlugu pisassiisoqarluni. Tunumi qilalugartassat 50-iutinneqarput, naak biologinit innersuussissutigineqaraluartoq pisassiisoqassanngilluinnartoq.

Biologit siunnersuutigisaannit sinniilluni pisassiinerit aamma sinerissap qanittuani qaleralinniarnernut saarullinniarnernullu atuupput.

KNAPK-li isumaqarpoq avataani aalisarnermik misileraanerup takutikkaa avataasiortut Naalakkersuisunit salliunneqartut.

- Killiffik allatut nalilersorneqarsinnaanngilaq, tassami Naalakkersuisut sinerissap qanittuani aalisarnermik nungutitsiniaasutut isigineqartariaqarput, aammalu aalisarneq pillugu ataatsimiititaliarsuup isumaliutissiissutaa eqqarsaatigalugu Naalakkersuisut sinerissap qanittuani aalisarnermik nungusaanerat ersarippoq, KNAPK-mi siulittaasoq oqarpoq.

Isornartorsiuineq akerlileraa

KNAPK-p isornartorsiuinera aalisarnermut piniarnermullu naalakkersuisup Karl Tobiassenip (S) akerlilerpaa.

- Soorunami uggornarpoq KNAPK taama isumaqarmat. Naalakkersuisulli aalisartukillisaanissamik suliaqarnerannik KNAPK-p oqaatigisaa illuatungilerusuppara. Aqutsiveqarfik 47-mi aalisarsinnaanermut allagartanik qinnuteqartoqarsinnaaleqqinnissaq aalajangerparput, aalisartut amerlanerulerniassammata, Karl Tobiassen Sermitsiaq.AG-mut oqarpoq.

Aqutsiveqarfik 47-miipput Upernavik, Uummannaq aamma Qeqertarsuup Tunua taakkulu nunaqarfii. Qalerallit annertunerusumik aalisarneqartarput.

Aalisarnerup iluani Naalakkersuisut suliaannut tunngatillugu Inatsisartut suliakkiutaannik Naalakkersuisut suliaqartartut, naalakkersuisup erseqqissarpaa. Aalisartut piniartullu ajornerusumik atugaqarnissaat Naalakkersuisut kissaatiginngikkaat aamma oqaatigaa.

Isumaqatiginninniarnerni akuliutissanngitsut

Naalakkersuisut aalisakkat akiinut isumaqatiginninniartoqarnerani akuliutinnginnissamik suleriusaat KNAPK-p aamma isornartorsiorpaa. KNAPK-p Royal Greenlandillu arnarluit suaannut akigititassanut isumaqatiginninniarnerat ukioq manna sivisunerusimavoq, tunisisinnaanerlu kingusinnerusukkut aallartittariaqarsimalluni.

- KNAPK tassuuna isumaqatigaara. Naalakkersuisulli akinut tunngatillugu isumaqatiginninniarnernut akuliuttussanngillat, isumaqatiginninniartussaaneq tunisassiorfinniippoq kattuffinniillunilu. Politikkikkut akuliuttussanngilagut, Karl Tobiassen nassuiaavoq.

Karl Tobiassenip erseqqissarpaa kattuffiit peqatigiillu oqaloqatiginnikkusuppata, Naalakkersuisut tamassumunnga ammasut.

Powered by Labrador CMS