Aalisartunut neqeroorut: Qassutitoqqat aningaasannassutigisigit
Aningaasanik sipaarit qassutitoqqallu pinngortitamut qimaannarnagit.
Kalaallit Nunaanni tamarmi qassusersorlutik aalisartunut neqeroorutaavoq, aningaasaqarnermik pitsaanerulersitsinissaq ilutigalugu nungusaataanngitsumik avatangiisinullu iluaqutaasumik atueqqinnissaq matumani anguniagaalluni.
Qalut Voninimi pisortap Cuno Jensenip Frydendahl Fiskenetimi tuniniaanermi pisortaq Brian Skovgård peqatigalugu najoqqutassaq nutaarluinnaq, qassusersorlutik aalisartunut sipaarutaalluarsinnaasoq saqummiuppaat.
- Qassutit atorunnaakkatit uagutsinnut tunniukkit qassutinillu nutaanik pissarsisinissannut allagartamik pillutit, tamanna pisiaqarnermut akikillisaataalluassaaq, pisortat marluk nungusaataanngitsumik ingerlatsinissaq pineqartillugu qaqutigoortumik suleqatigiilersimasut nassuiaapput.
Aningaasarpassuit sipaarneqassasut
- Umiatsiaaararsorluni aalisartoq, assersuutigalugu qassutinik qaleralinniutinik 30-nik nungullarluinnarsimasunik uagutsinnut tunniussinermini qassutillu tunniunneqartut amerlaqqataanik inniminniinermini 15.000 koruuninik sipaaruteqarsinnaavoq, qassutit inniminnikkat atoqqitaapput, pisortat taakku marluk ilisimatitsipput, peqatigitillugulu erseqqissaatigaat tamanna avatangiisinut pitsaasumik sunniuteqassasoq. Maannami qassutitoqqat imaanut nunamulluunniit qimaannannginnissaanut aningaasatigut kajumissaaruteqalerpoq.
Qassutitoqqat aningaasanik pissarsissutiginagit allagartamik tunineqartarnissamut nassuiaataavoq, qassutit tunniunneranni aningaasarsissutiginiarlugit tillinneqartalernissaasa pinngitsoortinneqarniarnera.
- Qassutitoqqat illoqarfinni sisamani inissiffigisimasatsinni tigunissaannut piareeqqavugut. Aalisartut qassutitik aggiutiinnarsinnaavaat, taava uagut nassiunnissaat, allunaasat qassutillu immikkoortiernissaat isumagissavavut, Cuno Jensen ilisimatitsivoq. Qalut Vonin Aasiaanni, Ilulissani, Sisimiuni Nuummilu immikkoortortaqarfeqarpoq.
Anguniagaavoq sineriammi sumiiffinni assingiinngitsuni tigooqqaaveqalernissaq, tassa qassutit atoqqinneqartussanngorlugit ajornaatsumik nassiunneqarsinnaanngorlugit.
Niuernermi suleqatigiit taakku marluullutik najoqqutassartik ilaatigut KNPAK-mut Sulisitsisunullu saqqummiussimavaat, oqaluttuarisinnaavaallu suliniutsik nutaaq tigulluarneqarsimasoq.
Neriuutigivaat qassutinik atoqqiinermi qassutit ukiumut 6000-iniit 8000-inut amerlatigisut isumagisarsinnaallugit, qassutit taamatut amerlatigisut umiarsuit 40 fodinik angissusillit Danmark aqqusaarlugu Estlandimut tallimariarluni arfineq-marloriarlunilluunniit assartuinermut naapertuupput.
Qassutit atoqqinneqarsinnaasut nipisanniutaapput, saarullinniutaalluik qaleralinniutaallutillu. Qaleralinniaq qassutinik allunaasanillu nammineq immikkoortiterisimasoq qassutinut ataatsinut 250 koruunisisassaaq. Immikkoortiterinissamut piffissaqanngikkuni pissarsinissamut allagartamik 200 koruuninik nalilimmik tunineqassaaq, qassutinik nutaanik pisippat taakku ilanngaatigineqassallutik.
Containeri siulleq qassutinik imalik nassiuneqarsimasoq
Suliffeqarfiit taakku marluk nutaamik najoqqutaqalersimasut Kommuneqarfik Sermersuumik suleqateqarsimapput, tassa qassutitoqqanik illoqarfimmi sumi tamaani qimaannakkanik katersisimagamik.
Qassutitoqqat ima amerlatigipput, allaat containeri 40 foditut angitigisoq ulikkaarsimallugu, taanna sisamanngormat Danmark aqqusaarlugu Estlandiliaanneqarpoq, tassani allunaasat qassutillu immikkoortiterneqarlutik.
Qassutit tamatuma kingorna Kinamut ingerlateqqinneqarput, tassani karritut isikkoqalersillugit suliarineqarput nioqqutissallu assigiinngitsut, soorlu pequtit, qajat, oqarasuaatit puui kuffertillu suliarinerannut atoqqinneqassallutik. Allunaasartai nutaanik qassutiliornermi atoqqinneqarsinnaapput.