Aalisartunut ikiorsiissuuteqartoqalersoq: Paasissutissat tunniunneqangajalerput
Naalakkersuisut sapaatip akunneri tamaasa sisamanngornermi ullaakkut ataatsimiittarnerminni aalisartunut ikiorsiissutissat oqaluuseriniarpaat. Kattuffiit aalisarnermillu inuussutissarsiuteqartut aningaasatigut ikiorsiissuteqartoqassanersoq pillugu paasitinneqarnissartik utaqqikatappaat.
Coronamut atatillugu aalisartunut ikiorsiissutissat qangali utaqqineqartut naammassineqangajalinnguatsiarput. Suleqatigiissitat Aningaasaqarnermut Naalakkersuisoqarfimmit pilersinneqarsimasut inassuteqaatitik Naalakkersuisunut tunniussimavaat, sisamanngornermi ullaakut ataatsimiinnerminni suliarisassaat.
KNAPK-mit nukingisaarutigineqarsimavoq, Naalakkersuisut inuussutissarsiortut allat ikiorserneqarsimanerat assigalugu, aalisartunut aningaasatigut ikiorsiissuteqarnissaat, erseqqissaatigaalu tamanna nukinginnartuusoq.
Taakku erseqqissaassutigaat, saarullinnut, raajannut saattuanullu akigititat corona pissutigalugu appariarujussuarsimasut, taamaammallu ikiorserneqarnissaq pisariaqartoq.
KNAPK-mit neriuutigineqarpoq, ikiorsiissutit kiilumut akigititat apparsimanerisa nalingannik taarsiissuteqarsinnaanermik ilaqassasut. Pingaartumik saarullinnut akigititat eqqarsaatigineqarput, umiatsiaararsorlutik aalisartorpassuit isertitarisarmatikkitr.
Ikiorsiissutit atuutereersut atorneqarsimanngitsut
KNAPK-mi pisortap Tønnes Berthelsenip siusinnerusukkut Sermitsiaq.AG-mut oqaatigisimavaa, ilaasortat tallimat inorlugit amerlassusillit ikiorsiissutinik atuutereersunik ikiorserneqarsimasut.
Taakku tassaapput Kapisilinni Nuup eqqaaniittumi aalisartut, killilersuinerit pissutigalugit piffissami sivikitsumi nunaqarfimmiit illoqarfimmut tunisiartorsinnaasarsimanngitsut.
Aalisartulli ikiorserneqarnissamut isumalluarsinnaalerput. Ikiorsiissuteqartoqassappalli tamanna piaartumik pisariaqarpoq.
2021-mummi aningaasanut inatsisissatut siunnersuummi aningaasanik ikiorsiissutinut amerlanerusunut atorneqartussanik immikkoortitsisoqarsimanngilaq. Ikiorsiissutit atorneqareersut septembarip 30-ani atorunnaartussaapput, tassa Naalakkersuisut sivitsuinissamik aalajangiinngippata.