Aalisartitseqatigiiffik pasinarsarneqartutut misigisimasoq

Kukkunersiuisut suliffeqarfiat Deloitte aqutsinermik misissuinermi annertusisami aalisarnermut naalakkersuisoqarfimmi allaffissornikkut aqutsinermut atatillugu aalisartitseqatigiiffinnik arlalinnik aqqisigut taallugit oqaatigisaqarsimavoq.

Taamaalilluni oqaatigineqarpoq, Naalakkersuisoqarfik ilaatigut Niisa Trawlimit uppernarsaatissanik pisariaqartunik pigisaqarsimanngitsooq ingerlatseqatigiiffiit avataasiorluni aalisarnermi aalisarsinnaanermut akuersissutinik pissarsinissamut piumasaqaatinik suli naammassinninnerannik nalilersuinissamut atorneqartussanik.

Pisariaqanngitsumik pasinarsaarineq

Niisa Trawimi allaffissornermut pisortaq Loui Sørensen isumaqarpoq, paasissutissat Sermitsiaq.AG-p Deloittep nalunaarusiaa aallaavigalugu saqqummiussimasai, ”ingerlatseqatigiiffinnut pisariaqanngitsumik tunngavissaqanngitsumillu pasinarsaarinermik pilersitsisimasut, allaaserisami aalisarnermut naalakkersuisoqarfimmi sulianik ingerlatsinerup amigarnerata allagaatinillu toqqorsisarnerup amigarnerata allaaserininssaat siunertarineqaraluartoq”.

- Niisa Trawl pilersinneqarnerminiilli ukiut tamaasa ingerlanerini aalisarnermut inatsimmi akuersissutinik tunineqarnissamut piumasaqaatinik, tassunga ilanngullugit piginnittuunermut piumasaqaatinik, naammassinnittarsimavoq. Tamanna ilisimasavut naapertorlugit aalisartitseqatigiiffiit sinnerinut aamma atuupppoq, Loui Sørensen erseqqissaavoq.

Taanna isumaqarpoq, paasissutissat nalunaarusiameersut ingerlatseqatigiiffiit aqqisigut taallugit oqaatigineqarfigisaat, ”ingerlatseqatigiiffiit akuersissutinik tunineqarnissamut piumasaqaatinik naammassinnissimanerannik qularutiginninnermik pilersitsisinnaasut, tamannalu ajornartorsiutaasorujussuusoq, ingerlatseqatigiiffiit piusinnaanissaannut tamanna tunngaviummat”.