Skip to main content

Aalisarnerup ajalusoornera: Maanna iliuuseqartoqassaaq

Aalisarnermut Naalakkersuisup Jens Immanuelsenip Grønlandsbankenip "aalisarnermi aningaasaqarnikkut ajalusoortoqalerneraalluni" nalunaarutaa pimoorullugu tiguaa, "isumaginninnikkullu aamma inuiaqatigiit aningaasaqarnerannut kinguneqaatissat" annertuut iliuuseqarfiginiarlugit iliuusissanik arlalinnik suliaqartorqarniartoq nalunaarutigalugu

Grønlandsbankenip ataasinngormat nalunaarutigaa, umiatsiaararsorluni aalisartunut aningaasaliissuteqartarnerminik unitsitsilluni, aalisakkat aningaasaqarnerlu eqqarsaatigalugit nungusaataanngitsumik ingerlatsisoqannginnera pissutigalugu.  Aningaaserivik isumaqarpoq, biologit inassuteqaataat sinnigaatsiarlugit pisassiisoqartarnera ilutigalugu aalisarsinnaanermut akuersissutit amerlavallaartut tunniunneqartartut.

Tusarneqartoq

Grønlandsbankenip taamatut iliuuseqariasaarnera Namminersorlutik Oqartussani Aalisarnermut Naalakkersuisup Jens Immanuelsenip allaffianit tusaaneqarpoq.

Jens ImmanuelsenipSermitsiaq.AG-mut oqaaseqaammini takisuumi uppernarsarpaa ”sinerissamut qanittumi qaleralinniarnermi umiatsiaaqqat amerlavallaalersimasut”.

Naalakkersuisoqarfik Qeqertarsuup Tunuani, Uummannami Upernavimmilu 2013-2019 qaleralinniarnerup qanoq ingerlasimaneranik misissueqqissaaqqammerpoq, nassuiaallu 
 Aalisarnermut Isumalioqatigiissitanut nassiunneqarsimavoq, naalakkersuisoq ilisimatitsivoq.

Akuersissutit amerlasoorpassuit tunniunneqarsimasut

- Aqutsiveqarfimmi 47-mi 2013-imiit 2019-imut umiatsiaararsortut
qaleralinniarnermut akuersissutaat agguaqatigiissillugu 37 procentimik amerleriarsimapput, kisianni pisassat ilisimatuussutsikkut siunnersuutaasut 20 procentimik ikileriarsimallutik, oplyser Jens Immanuelsenilisimatitsivoq nangillunilu oqaatigalugu:

- Pisut tamakku aarlerinaatilittut isigaakka, tassami pisassatut
ilisimatuussutsikkut siunnersuutaasut ikileriarsimanerat pisuussutit
ikilisimanerannut ersiutaammat. Tamatumalu peqatigisaanik
qaleralinniarsinnaanermut akuersissutit amerleriarsimammata aalisakkat aalisartullu amerlassusii imminnut naapertuukkunnaarsimapput, tamannalu aalisartut ataasiakkaat pisassakinnerulernerannik nassataqarpoq.

Kinguneri

Jens Immanuelsen isumaqarpoq, pisut tamakku “aalisarnermik isumalluuteqarnerup annerulersimaneranik ersersitsisut, taavalu sinerissamut qanittumi qaleralinniarneq kinguariartulissagaluarpat inuit atugaannut aningaasarsiornerannullu kingunerlussasoq”.

- Taamaammat Qeqertarsuup Tunuata aqutsiveqarfiani aammalu aqutsiveqarfiup 47-p sinnerani sumiffinni allani aalisartunut nutaanut qaleralinniarnermut akuersissutinik killiliisoqarsinnaanera naalakkersuisoqarfimmit sulissutigineqarpoq, umiatsiaararsortut amerlavallaalersimanerat pissutigalugu. Killilersimaarinninneq pisassiissutaasut aamma sinerissap qanittuani qaleralinniarlutik umiatsiaararsortut amerlassusiisa imminut naapertuutilernissaasa tungaannut minnerpaamik ingerlassaaq, Jens Immanuelsen naqissusiivoq.

Pisassiissutit ikiliartuaartinneqassasut

Taassuuma aamma innersuussutigaa, 2017-imi Naalakkersuisoqarfik aalisartullu peqatigiillutik Qeqertarsuup Tunuani qaleralinniarnerup piujuaannartitsinermik tunngaveqalernissaanik siunertamik nalunaaruteqarsimasut. Qaleralittassiissutit ukiut sisamat
ingerlaneranni ilisimatuussutsikkut siunnersuutinut
naapertuukkiartuaartussanngorlugit ikiliartortinneqassapput.

- 2020-mi tamatumalu kingorna sinerissamut qanittumi qaleralinniarnermi pisassiissutinik ikiliartuaarsitsinissaq naalakkersuisoqarfimmit sulissutigineqarpoq, tamatumalu saniatigut qaammammut pisassiissutaasut tamakkerneqaraangata aqutsiveqarfiit matuneqartassallutik, Jens Immanuelsen ilismatitsivoq.

Aalisarnermut Naalakkersuisup aamma oqaatigaa isumaqarluni ”sinerissamut qanittumi qaleralinniarneq tunngaviusumik
isummerfigineqarlunilu allanngortiteriffigineqartariaqartoq.”.

Aalisarnermut Ataatsimiititaliarsuaq

- Inuussutissarsiut aningaasarsiornikkut uumasoqassutsikkullu piujuarsinnaasoq qularnaartariaqarparput. Naalakkersuisoqarfik qaleralinniarnermut nalunaarummut missingersuusiorsimavoq, tassanilu massakkut aporfiusunik qassiinik aaqqiiniartoqarput. Tamatuma saniatigut sinerissamut qanittumi qaleralinniarnerup aqunneqarnera pillugu aalisarnermut ataatsimiititaliarsuaq
immikkut ittumik suliaqarpoq, qaleralinniarnerlu pillugu aalisarnermut ataatsimiititaliarsuup kaammattuuteqarnissaannut qilanaarpunga, Jens Immanuelsen paasissutissiivoq.

Sinerissamut qanittumi qaleralinniarneq kisimi Naalakkersuisoqarfimmit isiginiarneqanngilaq. Aamma sinerissamut qanittumi saarullinniarneq assagiarsunniarnerlu
misissoqqissaarneqarpoq, Jens Immanuelsenittaaq naatsorsuutigaa pisuussutit siunissami ungasinnerusumi iluaqutigineqartuarsinnaanerat qularnaarniarlugu aqutsinikkut arlaatigut iliuuseqartoqassasoq.

“Iliuuseqarnissamut massakkut piffissanngortoq”

- Isumaqarpunga Naalakkersuisut sinnerlugit oqarsinnaallunga
iliuuseqarnissamut massakkut piffissanngortoq, soorlu aningaaserivik taama iliortoq. Inuiaqatigiittut aningaasarsiorfiusinnaasunik allanik
eqqarsartariaqalerpugut allannguutinut annikitsunut
misikkarippallaarunnaarnissarput siunertaralugu.
Allanngortitsisoqartariaqalerneranik aalisartut piniartullu peqatigiiffiisa nalunaaruteqartarnerat nuannaarutigaara, Jens Immanuelsern oqarpoq, naqissuserlugulu suliniutit aallartereersut naatsorsuutigalugulu “ukiaq manna sulineq aallartilluariissasoq”.

Læs hele sagen:

  1. Aningaaseriviup umiatsiaararsorlutik aalisartunut aningaasaliinini tamaasa unitsippai
  2. Politikkikkut siunnerfik nutaaq pisariaqarpoq
  3. Jollefiskerne kommer på udvalgsdagsorden
  4. Umiatsiaararsorlutik aalisartut ataatsimiititaliami oqaluuserineqartussanngortut
  5. KNAPK sinerissamut qanittumi aalisarneq pillugu iliuusissatut pilersaarusioqqusisoq
  6. Banknordik umiatsiaararsorlutik aalisartunut ikiuisarnerminik ingerlatsiinnarniartoq
  7. Aningaaseriviup aalisarneq pimoorunneqartoq erseqqissaatigaa
  8. Naalakkersuisut umiatsiaararsorlutik aalisartut aningaasatigut ikiorserniarpaat?
  9. Krusep Grønlandsbanken kamaakkaa
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER