Aalisarnermut kattuffiit siunissamut ernumasut
Aalisarnermut Piniarnermullu Naalakkersuisup aalisartut tusaaniarneqassasut naqissuserpaa. Taamaakkaluartoq aalisarnermik inuussutissarsiuteqarnerup siunissami ilungersunartumik inissinnissaa ernumanartoqartoq aalisarnermut kattuffiit isumaqarput.
Aalisarnermut Piniarnermullu Naalakkersuisup Aqqaluaq B. Egedep, Inuit Ataqatigiit, 13. aamma 19. januar Nuummi Ilulissanilu aalisarneq pillugu isumasioqatigiissitsinissaralua, Covid-19-ip annertuumik tuniluunnera pissutigalugu piffissaligaanngitsumik kinguartinneqarallarnera, aalisarnermut kattuffiit KNAPK-p aamma SQAPK-p uggoraat.
Aviisi Sermitsiaq taama allappoq.
Tassami Aalisarneq pillugu Ataatsimiititaliarsuup isumaliutissiissutaasa imarisaasa ilai kiisalu Naalakkersuisut aalisarnermik inuussutissarsiuteqarnermik aqutsinerat, aalisarnermik kattuffiit anguniagaannut arlalitsigut naapertuutinngitsut, siunissarlu ernumanartoqartoq KNAPK-p SQAPK-llu siulittaasui isumaqarput.
Siunissaq ernumanartoqartoq
Aalisarneq pillugu isumasioqatigiinnissamut atatillugu KNAPK-mi siulersuisuunerit ataatsimoorussamik pingaarutilinnik oqariartuuteqarnissaat pilersaarutaasimagaluartoq, kiisalu KNAPK-p immikkoortortaqarfii sinerissamiittut Aalisarneq pillugu Isumalioqatigiissitap isumaliutissiissutaaniik Naalakkersuisullu anguniagaanniik allarluinnarnik oqariartuuteqarnissaat qularutiginngikkini, KNAPK-p siulittaasua Nikkulaat Jeremiassen oqarpoq.
– Ataatsimiititaliarsuup oqariartuutaa eqqarsaatigalugu ilaasortatta ikilisarneqarnissaat isumaliutissiissutigineqarpoq, tamannalu KNAPK-p akuersaarsinnaanngilaa.
– Sinerissap qanittuani aalisartut ikilisarneqarnissaat aalisarnermut inatsisissamut ikkunneqassagaluarpat, tamanna eqquinerlorujussuassaaq, Nikkulaat Jeremiassen oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: