Skip to main content

Aalisarnermut inatsit: IA maanna erseqqinnerusumik saqqummiussaqarpoq

Aalisarnermut inatsimmut nutaamut tunngatillugu Inuit Ataqatigiit arlalitsigut Siumumit allaanerussuteqarpoq. IA-p siulittaasuata, Sara Olsvigip, partiip aalisarnermut inatsimmut nutaamut siunnersuutini saqqummiummagu tamanna paasinarsivoq.

Maanna nunatsinni kommunit aamma soraarnerussutisiassanut aningaasaateqarfiit aalisarnermut aningaasaliinissaminnut periarfissaqalissapput. Aammattaaq IA-p ‘’piginneqataassutinut niuerfeqalernissamq – børsimik imaluunniit assingusumik – kalaallit aalisarnermutingerlatseqatigiiffiinut’’ sulissutiginiarpaa.

Ukiuni 15-ini atorunnaarsitsiartorneq

Aammattaaq pisassiissutit killilersugaanngitsut ukiuni 15-ini tulliuttuni atorunnaarsikkiartorneqassapput, tamannalu qinersinissap nalunaaruteqarneranut atatillugu aalisarnermut inatsisissami atorunnaarsinneqartumi Karl-Kristian Krusep siunnersuutigisaanit ukiunik qulinik sivisuneruvoq.

Aalisarnikkut inuussutissarsiuteqarnerup tamanit oqartussaaqataaffigineqarnera annertusiniarlugu – piginneqataassutsit amerlanerusunut siammarterlugit – Inuit Ataqatigiit ‘’pisassiissutinut børsi’’-mik taagorneqartoq misilittartinniarpaat, taanna pisassiissutit ineriartortissutitut taagorneqartut 10 procentit ataasiakkaarlugit tunineqarsinnaasut (IOK)-nik taagorneqartut tamatumunnga atatillugu pilersinneqassallutik.

Naalakkersuisut nukinnut nutaanut inuusuttunut aalisarnermik inuussutissarsiornermut ilanngukkusuttunut aallarnisaanermut ikiorsiinissaat tassani siunertaavoq, partiip tassani aalisakkat pingasut IOK-nut ilanngunneqassanersut toqqaareerput: raaja, qalerallit aamma assagiarsuit.

Ersarinnerulersitsineq

Pisassiissutit agguaanneqartarnerisa ersarinnerulersinneqarnissaat pingaaruteqartoq, Sara Olsvigip naqissuserpaa, taamaalilluni pisassiissutit qanoq aamma suut malittarisassat naapertorlugu agguaanneqartarnersut ersarinnerussammat. Tamatumunnga atatillugu Aalisarnermut siunnersuisoqatigiit piginnaasaat nukittorsarneqarlutillu annertusarneqarnissaat partiip kissaatigaa. Siunnersuisoqatigiit Naalakkersuisunut tulluartumik akerliliisinnaanissaat siunertaavoq, tunngaviillu ersarissut illuatungeriit malitassaat nassuiaatigineqassapput.

Aalisarnermut inatsit assortuussutaasoq, ukiukkut ataatsimiinnermi siullermeerneqartoq Karl-Kristian Krusep saqqummiummagu, killiligaanngitsumik pisassiissutit atorunnaarsinnissaanut ukiunik tallimanik sioqqutsilluni kalerriutiginnittoqartarnissaa tassani saqqummiunneqarpoq.

Inuussutissarsiortunut tusarnaartut

- Ukiunik 15-nik sioqqutsilluni kalerriuteqartarnissaq siunnersuutigaarput. Tamanna siunnersuutigaarput. Inuussutissarsiortunut tusarnaarpugut, Sara Olsvig oqarpoq, tassanilu umiarsuaatileqatigiissuit milliardilikkaanik taarsigassiisoqarnissaanik sulianik aallartitsinissamut piareersimasimasut unnersuussutigaa. Ukiuni 15-ini periarfissiinikkut ingerlatseqatigiiffiit aningaasaliissutitik nalikillilernissaannut angumersisinnaassasut, IA neriuuteqarpoq.

Royal Greenlandip namminersortunngorsarneqarnissaa IA-p itigartitsissutigaa. Akerlianik ingerlatseqatigiiffik suliffeqarfinnut allanut maligassiuisuutinniarpaat.

Inuttat pillugit malittarisassat sakkukillineqassapput

Karl-Kristian Krusep siunnersuutaata akerlianik partiip kilisaatini inuttat aqumiut pillugit malittarisassat sakkukillisinniarpaat. Inuttat aqumiut ikinnerpaamik 60 procentii ukiuni marlunni minnerpaamik nunatsinni najugaqarlutillu akileraartartooreersimasariaqarput. Krusep taakku 90 procentimut qaffanneqarnissaat ukiaq siumut kalerriutigaa, tamannalu inuussutissarsiortunit annertuumik nilliatitsivoq, taakku umiarsuit kalaallinik piukkunnartunik inuttalersorneqarnissaat takujuminaatsippaat.

IA-p procenti allanngornianngilaa, kisianni kalaallit Danmarkimi imaluunniit nunani allani suliffeqarallarsimasut qanoq ilillutik aalisarluni inuussutissarsiornermut inuttanut maleruagassat aporfiginagit utersinnaanerat atugaat sakkukilliniarpaat.

Isummersuisut pilersinneqassapput

Inuit Ataqatigiit aamma isummersuisunik pilersitsiniarput, taakku oqallinnermik tulluarsaallutillu isumassarsianik inerititsissapput, inuiaqatigiit suliffeqarfiillu aningaasaqarnerannik ilisimasanik inuussutissarsiornerup iluani tapeeqataassallutik.

Aalisarnermut inatsit qinigaaffimmi tullermi akuerineqassasoq, Sara Olsvigip tusagassiortunik katersortitsinermi naqissuserpaa, inatsisillu pingaarutillip nuna tamakkerlugu isumaqatigiissutigineqarnissaa pingaaruteqartoq oqaatigalugu.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER