Aalisarnermut inatsit: Aappaagu aasakkut siunnersuuteqartoqassaaq
Aalisarneq pillugu ataatsimiititaliarsuaq ippassaq siullermeerluni ataatsimiippoq. Aalisarnermut inatsimmik nutaamik siunnersuusiornissamut aappaagu aasakkut juunip tungaanut piffissaqarpoq.
Aalisarnermut inatsisissamik nutaamik suliaqarneq kiisami suliarineqaqqilerpoq. Tassami Aalisarneq pillugu ataatsimiititaliarsuaq siullermeerluni ippassaq Nuummi Hotel Hans Egedemi ataatsimiippoq.
Ataatsimiinneq siullermik ataatsimiititaliap sulinermini tunngavissaanik aajalangersaanermut atorneqarpoq, suliassat nassuiaataat aallaavigineqarlutik.
Ataatsimiititaliarsuaq aalisarnermut inatsimmut allannguutissamik siunnersuuteqassaaq, ’siunnersuutit aalisarnermi ineriartornissamut periarfissat pitsaanerulernissaannut iluaqutaasinnaasut pillugit aamma inuiaqatigiit aalisarnermik inuussutissarsiuteqarnermik pisuussutinillu annerpaamik iluaquteqalernissaat anguniarlugu.’
- Siullermeerluni ataatsimiinneq ajunngitsumik anersaaqarluni ingerlanneqartoq naammagisimaaqaara. Nuannaaqaanga sulilluta aallartikkatta, siullermillu ataatsimiinneq isumalluarnarpoq Aalisarnermut Ataatsimiititaliarsuup suliaminik naammassinninniarnissaanut, Aalisarnermut Ataatsimiititaliarsuup siulittaasua, eqqartuussissuserisoq Jens Paulsen oqarpoq.
Ukiup affaanik sivitsorneqartoq
Ataatsimiititaliarsuup aamma sammisat suliarinissaannut piffissamik pilersaarutaagallartumik akuersipput.
Siullermik pilersaarutaagaluarpoq, ataatsimiititaliarsuup isumaliutissiissutini ukiup naanerani tunniutissagaa, kisianni suliassat nassuiarneqarneranni aalajangerneqarpoq, ukiup affaanik sivitsorneqassasoq, suliarlu juunimi 2020-imi naammassineqassasoq.
- Suliassaq annertooq imaannaanngitsorlu aallartissimagipput ilisimaneqarpoq, taamaattorli sulinissatsinnut tunngavissavut aalajangerneqareerput, aallartilluareerpugullu, Aalisarnermut Ataatsimiititaliarsuarmi siulittaasup tullia, Professor Emeritus Peder Andersen, kimulluunniit attuumassuteqarnatik ataatsimiititaliarsuarmi ilaasortaasup aappaa, taama oqarpoq.