Aalisarnermut inatsit nutaaq qaqugu pilersinneqassanersoq nalunartoq
Aalisarnermut, piniarnermut nunalernermullu naalakkersuisunngortup, aalisarnermut inatsisissatut siunnersuut Inatsisartuni qaqugu saqqummiunneqarumaanersoq, suli oqaatigisinnaanngilaa. Taamaallaalli qinigaaffiup ingerlarnerani saqqummiunneqarumaarnera oqaatigalugu
Naalakkersuisoqatigiinngortuni politikerit aalisarnermi atugassarititaasut allanngortinneqarnissaat inuussutissarsiummilu suliffissanik amerlanerusunik pilersitsisoqarnissaa sulissutigerusuppaat, Sermitsiaq allappoq.
Aalisarnermut inatsisissatut siunnersuut 2017-imi ukiakkut ataatsimiinnermi siullermeerneqarpoq, qinersisoqartussanngornerali pissutigalugu siunnersuut atorunnaarsinneqarluni.
Aalisarnermulli naalakkersuisunngortup, Erik Jensenip (S), aalisarnermut inatsisissatut siunnersuummik qaqugu saqqummiussisoqarumaarnera, ullulerusunngilaa.
- Aalisarnermut inatsisissatut siunnersuummik qaqugu saqqummiussaqarsinnaanerput eqqoriaruminaappoq, suliassamik ingerlatsilluarnissarput tamatumalu qaffasissumik pinissaa uatsinnut aamma pingaaruteqarmat. Illuatungeriit naapeqatigisarnerat sivisusarsinnaavoq, tusarniaanermullu akissutit aamma sivisunaarsinnaallutik, taamaattumik aalisarnermut inatsissamut siunnersuummik ineriikkamik qaqugu naatsorsuutigisaqarsinnaanerput ulluleruminaappoq, Erik Jensen Sermitsiamut oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: