aalisarnermut inatsit
Aalisarnermut inatsit "naggataarneqarpoq"
Inatsisartut ukiaanerani ataatsimiinnerat ulloq 16. november naggataarneranni "naggataarnavianngillat". Immikkoortoq 18-imi – ukiumi kingullertut – aalisarnermut inatsissatut siunnersuut siullermeerneqassaaq.
Aalisarnermut inatsisissaq Inatsiartunit eqqartorneqannginnerani inatsisissatut siunnersuutit 15-it aalajangiiffigisassatulli siunnersuutit marluk taasissutigeqqaassaavaat. Ulloq, politikkerit juleferiannginneranni, sivisussaqisoq ilimanaateqarpoq.
Inatsisartut allaffeqarfiata paasissutissiaraa, inatsit siusinnerusukkut oqallisigineqarsinnaannginnera.
Naalakkersuisut neriorsuutigisimavaat, inatsisissatut siunnersuut kingunersinnerpaamik ulloq 8. november politikkerinut nassiunneqassasoq.
Taamaasillutik politikkerit nunatsinni inuussutissarsiutit pingaarnersaannik mumisitseriaannaq nunattalu karsianut millionerpassuarnik annaasaqarfiusinnaasoq, Inatsisartut ataatsimiittarfianni eqqartorneqarnissaanut ullut arfineq-pingasuinnaat periarfissaraat.
Taamaattoq inatsisissatut siunnersuutip ataatsimiititaliani eqqartorneqarnissaanut periarfissaqarluassapput, inatsissatummi siunnersuut aatsaat 2018-imi upernaakkut ataatsimiinnermi aappassaaneerneqartussaavoq.