Aalisarnermut inatsit ataatsimiititarsualiuutissavaat
Ikinnerussuteqarlutik naalakkersuisut Siumut, Atassut aamma Nunatta Qitornai inatsisartoqarnikkut Demokraatinit tapersersorneqartut aalisarnermut inatsisip ilusilersornissaani aalisarnermut attuumassuteqartut suleqatiseraat
Aalisarnermut inatsisissap qaqugu atuutilernissaa ullulerneqanngilaq. Naalakkersuisunngortut marlunngornermi ullup qeqqa tusagassiortunik katersortitsinermi taama nalunaaruteqarput.
Siumut, Atassut, Nunatta Qitornai aamma Demokraatit isumaqatigiipput aalisarnermut inatsisissatut siunnersuummik saqqummiussisussamik ataatsimiititaliarsuarmik pilersitsisoqassasoq.
- Ataatsimiititaliarsuit ukiut arlallit sulisinnaasarput. Taava imaappa aalisarnermut inatsisissaq suli ukiuni arlalinni utaqqineqassasoq?
- Ataatsimiititaliarsuup sivisuumik sulinissaa naatsorsuutiginngilarput. Suliap sivisussusissaa pillugu aalajangersaasoqartussaavoq malinneqartussamik. Apeqqutit arlallit misissorneqaqqaartussaapput siunnersuutip nutaap saqqummiunneqannginnerani, Kim Kielsen oqarpoq.
Erik Jensen Siumumeersoq maanna aalisarnermut politikkikkut akisussaasuuvoq, taamaattoq Kim Kielsenip suli nalunaarutiginngilaa kina aalisarnermut naalakkersuisunngussanersoq aammalu naalakkersuisoqarfiit assigiinngitsut kikkunnik inuttaqassanersut.
- Naalakkersuisuni ilaasortassatut siunnersuutit Inatsisartut siulittaasoqarfiannut nalunaarutigineqarumaarput. Aqagu Inatsisartut ammaanersiorneqarneranni ammaanermi oqalugiaateqartussaavunga tassanilu ilanngullugit nalunaarutigiumaarpakka kikkut naalakkersuisuni ilaasortanngornersut, Kim Kielsen oqarpoq.
Aalisarnermut inatsisissap suliarineqarnerani partiit kisimik suleqatigiserineqassanngillat.
- Aalisarneq pillugu inatsisissaq sivisuumik attanneqarsinnaasoq naalakkersuisooqatigiit susassaqartullu naapeqatigiissutigisinnaasaannik suliaqartoqassaaq, Naalakkersuisooqatigiilersut isumaqatigiissumminni allapput.