aalisarnermut inatsit
Aalisarnermut inatsissaq taarsiivigititseqqunermik kinguneqartitsisinnaavoq
Raajartassiissutinut allannguutini ingerlatitseqatigiiffiit Namminersorlutik Oqartussat taarsiivigeqqullutit eqqartuussivilersuussinnaavaat
Aalisarnermut inatsisissaq akuerineqassappat akileraartut taarsiivigeqqussutinut akiliisalersinnaapput.
Inatsimmut oqaaseqaammi erserpoq.
Raajartassiissutinut agguaassisarnermi allannguutit marluk pissutigalugit ingerlatsiviit eqqartuussivilersuussisinnaalissapput.
Toqqaannanngitsumik piginneqataaneq
Allannguutissap aappaani pisassiissutinit pigisanik piginnittuunermik naatsorsuinermi siunissami pisassiissutinit pigisanik toqqaannanngitsumik pigisat aamma pisassiissutinit pigisani aalajangiisumik sunniuteqarfiusut ilanngullugit naatsorsorneqartassapput. Siunnersuummi raajartassiissuutit inunnut ataasiakkaanut agguaanneqartarnerat pinaveersaartitsisuussaaq.
Pisassiissutinillu pigisat akit suliffeqarfinnut ataasiakkaanut nalingisa assingi atorlugit suliffeqarfiit ataasiakkaat pisassiissutinit pigisat tunisinnaanngippatigit tamanna suliffeqarfinnit taakkunanit pigisanik nalilinnik pisassiissutinit pigisanik piginnittunut nutaanut agguaasseqqinnermik kinguneqassaaq. Tamannalu akileraartartut aningaasartuutigilersinnaangaat, atorfilittat naliliipput.
- Suliffeqarfiit namminersortut, inatsisissatut siunnersuutikkut annaasaqartut, annaasaqarnermut taarsiiffigineqarnissamik piumasaqarsinnaasut aamma eqqartuussivimmi suliami ajugaassappata siunnersuut taarsiissutissat suliami aningaasartuutit ilanngullugit annertoqataannik pisortat aningaasaqarnerannik artukkiissaaq, inatsisissami allassimavoq.
Sinerissap qanittuani avataasiorlunilu 50/50-mik agguassinerit
Allannguutissap aappaani avataani sinerissallu qanittuani raajanik pissassiissutinik agguaariaaseq Nammisorlutik Oqartussanut aningaasartuutaasinnaavoq. Ullumikkut pisassiissutit 57 procentii Kitaani avataasiortunut pisassiissutigineqartarput sinerissallu qanittuani pisassiissutigineqartartut 43 procentiullutik. Inatsisissatulli siunnersuut naapertorlugu siunissami tamarmik 50 procentimik tamarmik agguarneqartalissapput.
Qulequttap siulianituut ingerlatsiviit pisassiissutigineqarsimasut annaasaqarlutik tunisinnaavaat tamatumalu kingunerussavaa taarsivigeqqulluni suliakkiineq.
Atuaruk: Inatsisissap nunatta karsianut millionilikkuutaanik akisunaassavaa