aalisarnermut inatsit
Aalisarnermut inatsissami milliardinik nalilimmik taarsiivigeqqussuteqartorqarsinnaavoq
Aalisarnermut inatsisissaq akuerineqassappat milliardilikkuutaanik nalilimmik taarsivigeqqussummik suliakkiisoqarsinnaavoq. Polar Seafoodimi siulersuisuini siulittaasoq Henrik Lethip oqaatigaa.
Aalisarnermut inatsissatut siunnersuummi sivisuumik pisaassiisutigineqartartut atorunnaarsinniarneqarput, tamannalu aalisarluartunut akisunaarujussuarneqarsinnaavoq. Siunnersuut ataasinngornermiit tusarniuutigineqalerpoq.
Angallatit nutaat 1,7 milliardi koruuninut
Royal Greenlandip, Polar Seafoodip, Qajaq Trawlip aamma Niisa Trawlip, kilisaatit angisuut nutaat 1,7 milliardi koruunit missaanni nalillit, amutsivinnut assigiinngitsunut piniarsimavaat. Kilisaatit aatsaat sanaartorneqaleruttorput.
Aningaasaliissutigineqartut pisassiissutit utertinneqarsinnaanerat eqqaaneqanngilluinnartut 2016-p ukiaanerani Naalakkersuisut akueraat. Umiarsuaatileqatigiillu taakku aningaasaliisimanitik annaaratarsinnaalerpaat, ukiualuimmi qaangiuppata pisassiissutit annaasussanngorpaat.
- Inatsisitigut qanoq inissisimanerluta inatsisilerituunit avataaneersunit nalilersortittariaqalissavarput, tassanilu pitsaanerpaat nassaarisinnaasagut atorniarpagut. Taarsiivigeqqunissamulli suliakkiinissamut, milliardid angullugit naleqarsinnaasumi, tunngavissaqarnerluta takujumaarparput, Henrik Leth naliliivoq.
Naatsorsuutit annikippallaartut
Inatsissatut siunnersuutigineqartup inuiaqatigiinnut ukiumut 14 aamma 130 millionit koruuninik naleqarnissaa Aalisarnermut Piniarnermullu Naalakkersuisoqarfiup nalilerpaa.
- Eqqoriaaneq kukkunerujussuuvoq. Uagut isumaqarpugut nunap karsiata ukiumut 300 aamma 400 millionit koruunit missaanni naleqassasoq, Henrik Leth oqarpoq, Naalakkersuisoqarfiulli qanoq isilluni kisitsisit naatsorsorsimanerai takuneqarsinnaannginnerat eqqumiigalugu.
- Ammanerunissaq eqqartortuarpaat, kisiannili qanoq naatsorsuisimanertik uppernarsarumanagu, siulersuisuni siulittaasoq eqqarsaqisoq oqarpoq.
- Taarsissuteqarnissamut apeqqut Inatsisartut inatsisilerituuannit naliiliiffigineqarsimasoq nalunngilarput, taamaattoq tamanna tamanut saqqummiunneqarumanngilaq, taanna paasissutissiivoq.
Pisassiissuteriaasissaq qularnartoq
Inatsisissatut siunnersuummi sivisuumik pisassiissutigineqartartut minnerpaamik ukiut tallimat iluani nalunaarutigineqarnerisigut atorunnaarsinneqassapput. Matuma kingornalu paasinarsivoq siunissami Naalakkersuisut raajanik aalisakkanillu pisassiissutinik agguaassisalerniartut.
- Nunani arlalippassuarni pisassanik agguaassisarneq politikkikkut qimakkiartorneqarpoq. Kalaallit Nunaanilu killormorluinnaq ingerlalluta, Polar Seafoodimi siulersuisuni siulittaasoq naliliivoq.