aalisarnermut inatsit
Aalisarnermut inatsisissatut siunnersuutip tunuartinneqarnissaa piumasaqaatigineqartoq
SIK-p GA-llu aalisarnermut inatsimmi allannguiniartoqarnera akerleraat, siunnersuullu tunuartinneqarnissaa piumasaqaatigalugu
SIK aamma Sulisitsisut Kattuffiata GA-p aalisarnermut inatsimmut siunnersuutip tunuartinneqarnissaa piumasaqaatigaat. Allannguutissatut siunnersuutigineqarpoq aalisartut kisimik aalisarsinnaanissamut pisinnaatitaaffeqarnissaat isumaqatigineqanngilaq.
Suliffeqarfiit aalisarnermut attuumassuteqanngitsut aalisarsinnaanermut pisinnaatitaanera siuliani Naalakkersuisut aalisarnermi inatsimmi ilannguppaat. Inatsisip Inatsisartuni oqaluuserineqarnerani Siumumit annertuumik akerlilerneqarpoq. Aalisartut maannakkut aalisarnissamik akuersissummik tunineqarsinnaanerat Siumumit maannakkut siunnersuutigineqarpoq.
Siunnersuut SIK-mit GA-mit Atassummiillu isumaqatigineqanngilaq, piumasaqaatigineqarporlu siunnersuutip tunuartinneqarnissaa.
Aarlerinartoq
- Aalisarnermut inuussutissarsiuteqartunut siunnersuut pitsaasumik kinguneqarnavianngilaq, siunnersuummi. Aningaasaliisartut aalisarnermut aalajangiisartunut tatiginninnerat annikillissaaq, taamaasilluni aamma ineriartornermut sunniuteqassalluni, GA-p pisortaa Brian Buus Pedersen nalunaarpoq.
Siunnersuut maannakkut tusarniaassutigineqarpoq. Aalisarnermut inatsit qaqagu naammassineqassanersoq suli aalajangiunneqanngilaq.
Aalisarnermut Naalakkersuisoq Finn Karlsen naalakkersuisunngorami siunnersuutip suliarineqarnissaa kinguartippaa. Tamanna Siumumit taperserneqarpoq, taamaasilluni aalisartunik tusarniaasoqarnera ingerlanneqarluni.