Aalisarnermut inatsisissaq pillugu qisuariaat allannguuteqartitsisoq

Aalisarnermut, Piniarnermut Nunalerinermullu Naalakkersuisoqarfiup Inatsisartut ukiakkut ataatsimiinnissaannut oqaluuserisassatut siunnersuutip nalunaarutiginissaanut Inatsisartut Allattoqarfiata maleruaqqusai piffissaliuunneqartullu naapertorlugit nalunaaruteqartoq naalakkersuisoq ilisimatitsivoq.

Erik Jensen

Namminersorlutik Oqartussanit tusagassiutinut nalunaarummi aalisarnermut naalakkersuisoq Erik Jensen oqarpoq, Naalakkersuisoqarfiup Inatsisartut ukiakkut ataatsimiinnissaannut oqaluuserisassatut siunnersuutip nalunaarutiginissaanut Inatsisartut Allattoqarfiata maleruaqqusai piffissaliuunneqartullu naapertorlugit nalunaaruteqartoq.

- Inatsisartut siulittaasoqarfiannut nalunaarutigineqartoq tassaavoq aalisarnermut inatsisissatut siunnersuutip oqaluuserineqarnissaata paasissutissartaanik kingusinnerusukkut nassitsinissamik nalunaaruteqarneq, Erik Jensen naqissusiivoq.

- Nittartakkakkut nutaarsiassaqartitsivik Sermitsiaq.AG sisamanngornermi septembarip 6-anni 2018-imi ilaatigut allappoq Aalisarnermut, Piniarnermut Nunalerinermullu Naalakkersuisup aalisarnermut inatsissasut siunnersuut Inatsisartut Alloqarfiannut tallimanngornermi aggustip 24-anni nalunaaqutaq 12.00 nallertinnagu tunniussimanngikkaa.

Eqqunngitsoq
- Tamanna ilumuunngilaq - ilumoortorli tassaammat Aalisarnermut, Piniarnermut Nunalerinermullu Naalakkersuisoqarfik aalisarnermut inatsisissap oqaluuserineqarnissaanut paasissutissartaanik Naalakkersuisut siulittaasoqarfiannut aggustip 23-anni 2018-imi nalunaarutiginnimmat. Taamaattumik eqqunngitsumik allaaserinninneq sakkortunerpaamik akuerinngilara Erik Jensen ilisimatitsivoq.

- Inatsisartut siulittaasoqarfiata Inatsisartut ataatsimiinnerisa nalaanni oqaluuserineqartussat pillugit maleruaqqussat tunngavigalugit aalisarnermut inatsisissatut siunnersuutitut oqaluuserisassaq uannit aamma Aalisarnermut, Piniarnermut Nunalerinermullu Naalakkersuisoqarfimmit nalunaarutigineqarmat erseqqissarusuppara, ullorlu tunniunneqarfissaata ullua nallertinnagu aamma nalunaarutigineqarluni, Erik Jensen erseqqissaavoq.

Ilisimatitsivoq 'Inatsisartut Siulittaasoqarfiata allakkatigut erseqqissarpaa aalajangersimallutik aalisarnermut inatsisissatut siunnersuutip ilanngunneqarnissaa pillugu aalajangernissaq kinguartissimallugu, allagaq ima paasineqassalluni Siulittaasoqarfik aalajangersinnaasoq siunnersuutigineqartoq oqaluuserissanut ilanngussinnaallugu.'

Apeqqut suli akineqanngitsoq
- Taamaattumik neriuppunga naatsorsuutigalugu Inatsisartut siulittaasoqarfiata Inatsisartut ukiakkut ataatsimiinnissaannut aalisarnermut inatsisissatut siunnersuut oqaluuserisassanngortissallugu akuerissagaa, aalisarnermut, piniarnermut nunalerinermullu naalakkersuisoq Erik Jensen oqarpoq. KNAPK-mut Sulisitsisunullu ataatsimeeqateqarnermi oqaatigereerpaa aalisarnermut inatsisissatut siunnersuutaasimasoq allannguuteqartinnagu Inatsisartut ukiaaneranni ataatsimiinneranni saqqummiunneqarumaartoq.

Tusagassiutinut nalunaaruteqannginnerani Sermitsiaq.AG-mit saaffigineqaraluarpoq, saaffiginnissulli akineqanngilaq.

Apeqqummi ataaseq paaserusunneqarpoq: Inatsisartut Siulittaasoqarfiannit siunnersuut suli akuerineqarsimanngippat, sooq inuussutissarsiteqartunut sullissisunut naqissusereersinnaavaa siunnersuut ukiaanerani ataatsimiittoqarnerani saqqummiunneqassanersoq?

Powered by Labrador CMS