Aalisarnermut inatsisissaq pillugu nipaarsaarussineq
Naak Naalakkersuisut 2018-ip ukiarmi aalisarnermut pillugu ataatsimiititaliarsuarmik pilersitsisoqarnissaa aalajangiussimangaluaraat, 2019-imilu aningaasanut inatsimmi millioninik aningaasaliffigineqarsimangaluartoq, suliap qanoq ingerlanneqarnera erseqqissumik akissuteqarfigineqanngilaq
Aalisarnermut inatsit pillugu Naalakkersuisut ersarissumik oqaatigerusutaat tassaavoq, aalisarneq pillugu ataatsimiititaliarsuup sulinini 2019-ip naanerani naammassereersimassagai.
Tamanna Aqqaluaq B. Egedep paragraf 37 naapertorlugu apeqqutaani allassimavoq.
Paasissutissat annikitsut
Taassumali saniatigut Naalakkersuisut qanoq iliuuseqarnissartik oqaatigerusunngilaat.
IA-minngaanneersup apeqquteqaatai aamma Aalisarnermut Naalakkersuisup Nikkulaat Jeremiassenip akissuteqaatai takukkit.
Apeqqut 8:
Aalisarnermut Inatsisissaq pillugu suliaq sumut killippa?
- Naalakkersuisut Aalisarneq pillugu ataatsimiititaliarsuarmik pilersitsinissamik isumaqatigiissusiorlutik ingerlataqarput, aamma qanoq suleriartoqaqqinnissamik nalilersuisoqarpoq, tassunga atatillugu aamma aalisarnermut inatsisissamik sulinermut tunngasunik.
Apeqqut 9:
Aalisarnermut inatsisissaq qaqugu Inatsisartuni sammineqassava?
- Apeqqut 8-mut akissutigineqartoq innersuussutigineqarpoq. Naalakkersuisulli siunnerfigivaat aalisarneq pillugu ataatsimiititaliarsuup sulinini 2019-ip naanerani naammassereersimassagai.
Apeqqut 10:
Aalisarnermut Inatsisissaq pillugu Naalakkersuisut sulinerat sumut killippa?
Apeqqut 8-mut 9-mullu akissutigineqartut innersuussutigineqarput.
Apeqqut 11:
Aalisarnermut Inatsisissaq pillugu suliap paamaarunneqarnera sumik
patsiseqarpa?
- Apeqqut 8-mut 9-mullu akissutigineqartut innersuussutigineqarput.