Aalisarnermut inatsisip nipaarsaarunneqarnera ernumatitsilerpoq

Aalisarnermut inatsisissaq Naalakkersuisunit suli suliareqqinneqalinnginnera, IA-p pakatsissutigaa. Aalisarnermut ataatsimiititaliarsuassaq eqqaaneqanngilaq.

Aalisarnermut ataatsimiititaliarsuarmik, aalisarneq pillugu inatsimmik nutaamik suliaqartussamik, pilersitsinissaq amerlanerussuteqartut 2018-imi isumaqatigiissutigineqarsimagaluartoq, qaammatit arlallit qaangiunneranni suli susoqanngilaq.

Søren Brandt, Sulisitsisuni suliaqarfimmi siulittaasoq, Aalisarnermut Naalakkersuisumit tusagaqarsimanngilaq.

- Qanoq pisoqarnissaanik nalornineq pissutigalugu aningaasaleerusuttut ikiliartorput. Inatsimmi politikerinit allanngortinniarneqarmat, naluarput qanoq inissisimanerluta, Søren Brandt, Qajaq Trawl, oqarpoq. Taassuma saniatigut inatsisip maanna atuuttup sutigut ajorneranik nassuiaasoqarnissaanik ujartuivoq.

Nalunaartoqarnissaa piumasarineqarpoq

IA-p politikkikkut oqaaseqartartuata, Aqqaluaq B. Egedep Naalakkersuisut ersarissumik nalunaarnissaat piumasaraa.

- Aalisartut inuussutissarsiornikkut patajaatsumik ingerlatsiinnassappata, pipallataanngitsumik, piffissaqarluartumik peqataatitsilluartumillu sulisoqartariaqarpoq. Aalisartulli ilaat maanna inerisaaniaraluarlutik inatsisissap siunissami qanoq sunniuteqarsinnaanera nalornisigigamikku aningaasaliinissaminnut unittooqqapput, Aqqaluaq B. Egede tusagassiutinut nalunaarummini erseqqissaavoq. Taassuma piumasaraa aalisarnermut inatsisissaq naalakkersuinikkut suliaqarnermi nukinngunneqassanngitsoq.

- Aalisarluartut nunatta aningaasarsiornikkut tunngavigisaat innarlerneqannginnissaat pingaaruteqarpoq, IA-mi politikkikkut oqaaseqartartoq allappoq.

IA-p siulittaasua, Múte B. Egede, siusinnerusukkut Naalakkersuisunut apeqquteqareerpoq, tassani paasiumallugu kikkut ataatsimiititaliarsuarmi issiassanersut, ataatsimiititaliarsuullu suliassai suussanersut. Maannamut suli akineqanngilaq.

Powered by Labrador CMS