Aalisarnermut Ataatsimiititaliaq: Immanuelsen tatigiunnaarparput

Aalisarnermut Ataatsimiititaliami amerlanerussuteqartut Aalisarnermut Naalakkersuisumik Jens Immanuelsenimik tatiginnikkunnaarlutik nalunaaruteqarmata, naalakkersuisup ataannarnissaa qularnarsivoq

Aalisarnermut Ataatsimiititaliami siulittaasup Henrik Fleischerip Siumumeersup tugassiorfitsigut nalunaaruteqarnermi ilisimatitsissutigaa, ataatsimiititaliap ”pisortatigoortumik suliniarnera innarlerneqartoq” aamma naalakkersuisup ”sulinini tukalluinnartmik ingerlakkaa”.

Tatiginnikkunnaarluni nalunaaruteqarnermi Demokraatineersoq Steen Lynge kisimi pinnani - ataatsimiititaliamit tamarmit tatiginnikkunnaartoqarpoq. Taamaalillutik Siumumi ilaasortat Henrik Fleischer, Mala Høy Kuko aamma Jens Danielsen parteeqatertik Naalakkersuisutut sulisoq tapersersorunnaarpaat, tupinnanngitsumillu illuatungiliuttutut politikkerinit Aqaluaq B Egedemit, Múte B. Egedemit aamma Partii Naleqqameersumit Hans Enoksenimit taperserneqarlutik.

Siumumi eqqissiviilliortoqaqqeriaannaasoq

Tatiginnikkunnaarluni nalunaaruteqarnerup takutippaa, partiimi Siumumi aasaru siulittaasussamik nutaamik toqqaasussami eqqissiviilliortoqaqqeriaannaasoq. Apeqqutaalluinnarporli Kim Kielsen tatiginnikkunnaarnermik nalunaaruteqarnermut isumaqataassanersoq Jens Immanuelsenimillu soraarsitsissanersoq. Imaluunniit Aalisarneq pillugu Ataatsimiititaliarsuup isumaliutissiissutaa utaqqimaaqqaarlugu naalakkersuisumik eqqissisimatitsissanersoq, Kim Kielsen taamaalilluni Siumumi ilaasortat pineqartut tatiginninnginnerminnik attassiinnassappata amerlanerussuteqartunit akerlerineqarlersinnaavoq.

Amerlanerussuteqartut tunngavilersuutaat

Amerlanerussuteqartut tatiginnikkunnaanerminnut tunngavilersuutigaat :

- Ataatsimiititaliap ernummatigaa Naalakkersuisup pineqartup aalisarnermut inatsisissaq pillugu suliamik ingerlatsinera matoqqasorujussuarmik ingerlanneqartoq, aamma inuiaqatigiinni aningaasarsiornikkut sulisartoqassutsikkullu sunniuteqarluinnartoq torersumik ilisimatitseqatigiiffiusumillu ingerlanneqanngitsoq mianernarsigaluttuinnartoq. Siunnerfeqarani sulineq, aningaasarsiornikkullu soqutigisallit salliutinnerullugit taakkualu kisiisa peqatiginiarsaralugit Naalakkersuisut sulinerat isertuussinerallu ataatsimiititaliap akuerisinnaanngilluinnarpaa? Naalakkersuisut politikkikkut ersarissumik aalisarneq pillugu siunnerfeqannginnerat inuiaqatigiinnut innarliisinnaammat naluneqanngilaq , amerlanerussuteqartut nalunaarumminni allapput.

- Naalakkersuisut aalisarnikkut aaqqissuusseqqinnissaq pillugu politikkikkut siunnerfiat ataatsimiititaliamiit ilisimaneqanngilaq. Suut tamarmik isertuussamik ingerlanneqarput, naak politikkikkut siunertat isertuunnagit peqataatitsilluni ingerlanneqarsinnaagaluartut tamanna ulloq manna tikillugu pisimanngilaq. Naalakkersuinikkut kisermaasserpalaartumik ingerlatsisoqassanngilaq, peqataatitsisoqartariaqarpoq. Ataatsimiititaliaq ilisimatinneqarlunilu akuutinneqartariaqarpoq. Matumani pisumi tamanna pisimanngilaq kinguneqartitsisoqartariaqarporlu. Minnerunngitsumik Inatsisartut ataatsimiititaliaat Naalakkersuisuniit eqqortumik paasissutissinneqartarlutillu torersumik sullinneqartussaapput. Aalajangersakkat malinneqartussaapput aamma Naalakkersuisuniit .

- Ataatsimiititaliap sulianik aalajangersimasunik Naalakkersuisup suliarisassamisut ingerlataanik nakkutilliiniarnerminut ajornartorsiutigaa Aalisarnermut, Piniarnermut Nunalerinermullu Naalakkersuisup isummaminik allannguisaqattaarnera. Naalakkersuinikkut suliat qaqugukkut naammassineqarnissaat aamma politikkikkut qanoq suliarineqarnissaat pillugit Naalakkersuisumit nassuiaatigineqartut allanngoqattaaginnavinnerat angusaqarniarnermut killiliisorujussuanngorput .

- Suliassat aallartinneqalersaartut aallartinneqareersimasulluunniit pillugit Naalakkersuisup paasissutissiissutaanik ataatsimiititaliaq tigusaqaraangat sivitsunngitsoq Naalakkersuisoq isummaminik allannguisarpoq – eqqarsaatigillannguarnagu siusinnerusukkut ataatsimiititaliamut qanoq paasissutissiisimanini aammalu aalajangiisimaneq allanngortinneqarsimappat tamatuma kingorna ataatsimiititaliamut paasissutissiinnguarnani .

- Inatsisartut naalakkersuinikkut sullinneqarnerat pitsaasuullunilu tutsuiginartuusariaqarpoq. Naalakkersuisumit ataatsimiititaliamut paasissutissiissutigineqartut ataatsimiititaliamit tutsuigineqarsinnaasariaqarput. Taamaanngippat suliassat annertuut pingaarutillillu suliarineqartariaqartut ataatsimiititaliamit sukumiisumik suliarineqarnissaat ajornarsissaaq – tamannalu ataatsimiititaliamut innuttaasunullu naapertuuttuliornerunngilaq. Taamaattumillu pissutsit nassuiaatigineqartut Naalakkersuisut Siulittaasuannit kinguneqartinneqarnissaat ataatsimiititaliamit kaammattuutigineqarpoq. Taamaattumillu Naalakkersuisut Siulittaasuata qisuariaateqartariaqarnera avaqqukkuminaappoq .

Steen Lynge Demokraatit isumaqaroq, Aalisarneq pillugu Ataatsimiititaliarsuup sulineranut akuliunneq piumasaqaateqarnerlu kukkusuusoq.

Demokraatit ikinnerussuteqarlutik oqaaseqaataat

Demokraatit imaattumik ikinnerussuteqarlutik oqaaseqaateqassapput :

- Demokraatini isumaqarpugut Aalisarneq pillugu Ataatsimiititaliarsuaq eqqissilluni sulinissaminut naggataatigullu aalisarnermut inatsisissatut siunnersuutissamut kaammattuuteqarnissaminut periarfissinneqartariaqartoq. Inatsisartut kaammattuutaajumaartunut isummernissaminnut naammattumik periarfissaqarumaarput, soorluttaaq amerlanerussuteqartunit taperserneqarumaartoq itigartinneqarluniluunniit.

- Peqatigitillugu Naalakkersuisut tungaannit aalajangersimaqqissaartunik naalakkersuinikkut piumasaqaateqartoqarsimannginnera aalajangersimasunilluunniit Aalisarneq pillugu Ataatsimiititaliarsuarmit inerniliisoqarnissaanik kissaateqartoqarsimannginnera pitsaasuuvoq.

- Naalakkersuisunik isummanik allannguisaqattaartitsineraalluni pisuutitsiniaanerit tunngavissaqanngitsut Demokraatinit isummerfigiumaneqanngillat.


- Demokraatit suli Aalisarnermut, Piniarnermut Nunalerinermullu Naalakkersuisumik tatiginnipput .

Powered by Labrador CMS