Aalisarnermik nittarsaassineq Sisimiuniit Ilulissanut nuunneqassaaq

Polar Fish Sisiunut annertuallaalersimavoq - ukiup tulliani Ilulissani ingerlanneqassaaq

Aalisarnermik nittarsaassineq Polar Fish ingerlallualersimavoq. Ingerlalluarnerami ima annertutigilersimavoq allaat Sisimiuni ingerlanneqarnissaminut annertuallaalersimalluni.

Akunnittarfinnimi inissat eqqarsaatigalugit aammalu Kalaallit Nunaanniit, Islandimiit, Norgemiit, Savalimmiuniit aammalu Qallunaat Nunaanniit peqataasussat 50-it annertunersumik inissamik pisariaqartitsipput.

Taamaammat Polar Fish 2020-mi Ilulissani aqqaneq-marlussaannik ingerlanneqassaaq. Ukiut tamaasa nittarsaassinerni Aalborg Kongres & Kultur Center (AKKC) suleqatigalugu aaqqissuunneqartarpoq.

KNAPK-mit kissaatigineqartoq

AKKC-mit aallartitat Avannaani saqqummersitsivissanik periarfissat kiisalu akunnittarfinni inissanik misissuiartorsimanerat aallaavigalugu nuussinissamik aalajangiineq KNAPK peqataatinneqarsimavoq.

- Ukiuni arlalinni Avannaani aalisarnermik nittarsaassisoqartarnissaa kissaatigisimavarput, tamannalu 2020-mi iluatsinnialernera kalaallit aalisartuinut aammalu nunamut tamarmut iluaqaataassaaq, KNAPK-mi siulittaasoq Henrik Sandgreen oqarpoq.

- Ilulissani najugaqartut 30 procentii sinnerlugit aalisartuupput illoqarfillu akunnittarfiillu amerlallutillu pitsaalluinnartuupput. Oqaloqatigiinnikkulli tamanut iluaqutaasussamik pitsaasumik suleqatigiittussanngorpugut , AKKC-mi pisortaaneq Nicolaj Holm oqarpoq.

Borgmester Palle Jerimiassenip – tupaallaatissaanngitsumik – nittarsaassinerup Ilulissanut ingerlanneqartalernissaa nuannaarutigaa.

- Aalborg Kongres & Kultur Center-ip nukittuumik inissisimanera uannut aalajangiisuulluinnarpoq. Europamilu aalisarnermik nittarsaassinerni annerpaamik – DanFish International – aaqqissuunerat pissutigalugu allamik pitsaanerusumik Ilulissanut suleqatiginnittoqarsinnaarpasinngilaq, borgmester oqarpoq.

Aalborg Kongres & Kultur Centerip Europami aalisarnermik nittarsaassinerit annersaat Dan Fish International aamma aaqqissuuttarpaat.

Polar Fish ulluni 6-8 oktober 2020 Ilulissat Timersortarfiani ingerlanneqassaaq. Taassuma kingorna ukiut marlukkaarlugit Ilulissani aalisarnermik nittarsaassinerit aaqissuunneqartalissapput.

Powered by Labrador CMS