Aalisarneq
Aalisarnermik nalunaarusiaq akerleriiffigineqartoq saqqummiunneqassaaq
Kalaallit Nunaanni Naatsorsueqqissaartarfimmi siulersuisut innersuussutigaat aalisakkerinermi aningaasat kaaviiaartitat pillugit nalunaarusiaq saqqummiunneqapallannissaa
Aalisakkerivinni sulisut ikinneruppata imminut akilersinnaanerusumik ingerlasinnaaneranik inerniliisimaneq, Kalaallit Nunaanni Naatsorsueqqissaartarfiup nalunaarusiaa oqallisigineqangaatsiarpoq.
Nalunaarusiaq ukioq kingulleq decembarip qaammataanilu piareersimavoq, taamaattoq nalunaarusiaq suli pisortatigoortumik saqqummiunneqarsimanngilaq.
Pisortani soqutigineqarluartoq
Tamannalu Kalaallit Nunaanni Naatsorsueqqissaartarfiup allanngortikkusuppaa. Tammanna ataatsimiinnermi kingullermi aalajagiuffigineqarpoq.
- Nalunaarusiaq pisortanit soqutigineqarluarnera pissutigalugu, Kalaallit Nunaannit Naatsorsueqqissaartarfimmi siulersuisut innersuussutigaat nalunaarusiaq piaartumik nittartakkamiilernissaa, siulersuisuit siulittaasuat, Vøgg Løwe Nielsen, tusagassiuutinut nalunaarummini allappoq.
Aamma atuaruk: Nalunaarusiaq: Raajat qalipallit siunniullugit tulaassuisussaatitaaneq taamaatissiu
Suliffinnik naleqartoq
Aningaasat kaaviaartut misissuiffigeqqissaarnerani qulequttat arlallit inerniliinermi uissuumminartoqarput.
Tamanna pillugu ilisimatuut isumaqarput raajat qalipai atatiinnarlugit qaalipaajarnerannit imminut akilersinnaanerusoq, aammalu sinerissap qanitaani pisassiissutigineqartartut kilisaatinut anginernut agguaanneqartalernissaat imminut akilersinnaanerusoq. Alloriarneq tamanna suliffinnik 430-nik naleqassaaq.
Nalunaarusiamik suliarinnittut taassuma sianiatigut isumaqarput, aalisartut ikinnerussasut, aammalu aalisakkat nikisinnagit tuniniarneqartalerpata nunami suliarineqaqqinnerannit isertissutigineqarsinnaasut annertunerujussuussasut. Taamaaliortoqassappalli pinngitsoorani aamma suliffinnik ikilisaasoqassaaq.
Qineqqusaarnermi piumasarineqartoq
2014-mi qineqqusaarnerup nalaani Siumup siulittaasuata Kim Kielsenip aalisakkerinermi aningaasat kaaviaartinneqartut nalunaarusiorneqarnissaa pingaartitaasa ilagisimavaat.
Taanna ilaatigut qineqqusaarnerup nalaani nipisap suai Nunatsinneersoq Irma pisiniarfiani Danmarkimiittumi akisoorujussuarmik pisiarisimasani saqqummerseqattaarpaa. Tassani malugeqqusimavaa aalisakkanik tunisassiornermi Nunarput isertitakippallaartoq.
Nalunaarusiaq Sermitsiap AG-llu pigivaat, taannalu uani atuarneqarsinnaavoq (qallunaatuinnaq allaqqavoq).