Aalisarnermi peqquserluttoqartarnerata annertussusia ilisimaneqanngilaq
Demokraatineersup Jens Frederik Nielsenip paaserusuppaa, aalisarnermi annertuumik peqquserluttoqartarnera pissutigalugu aalisarnermik nakkutilliineq pillugu nalunaarutip nutaap oqaluuserineqartorujussuullu suliarineqarnissaa aalajangiunneqarsimanersoq. Taamaattoqanngitsoq, Naalakkersuisut erseqqissaapput.
Sooq aalisarnermik nakkutilliineq pillugu nalunaarummik nutaamik suliaqartoqarnissaa KANUAANA-mit pisariaqartutut nalilerneqarsimava? Tamanna Demokraatit sinnerlugit Inatsisartunut ilaasortap, Jens-Frederik Nielsenip, paaserusuppaa.
Taamaattumik §37 naapertorlugu apeqqut aqqutigalugu aalisarnermi annertuumik peqquserluttoqartarneranik oqartussanit isumaqartoqarnera tunngavigalugu nalunaarutip suliarineqarneranik tusatsiakkat ilumoornersut ilumuunnginnersulluunniit akineqaqquaa.
Kisianni Aalisarnermut Piniarnermullu Naalakkersuisoq, nalunaarutip tusatsiakkanut attuumassuteqannginneraavoq. Tusatsiakkanik ilisimasaqartoqanngitsoq, akissutigineqartut ilaanni atuarneqarsinnaavoq.
Tusatsiakkat tunngavigalugit inatsisini malittarisassiortoqartanngilaq
- Akerlianik isumaqarpunga aalisarnermik inuussutissarsiuteqarneq ataatsimut isigalugu angusaqarfiulluartartoq inuussutissarsiutaasorlu inatsisinik malinniffiusoq. (…) Taamatut oqareerluni aalisarnermik inuussutissarsiummi - inuussutissarsiutit assigiinngitsut allat assigalugit – pasitsaassaqavinnermi politiinut unnerluutigineqartartunik annikinnerusunik annertunerusunillu nioqqutitsisoqartarpoq.
Naalakkersuisoq paasissutissiilluni allappoq, politiinut unnerluutiginninnerit amerlassusaannik maannakkut naatsorsuusiortoqarnikuunngitsoq.
- Tamanna pillugu ilisimatitsissutigissavara Naalakkersuisut tusatsiakkat tunngavigalugit inatsisini malittarisassiunngisaannartut, kisiannili innuttaasut inuiaqatigiillu soqutigisaat aallunniarlugit sunniuteqartumik aqutsinissamut nakkutilliinissamullu pisariaqartunik malittarisassiortartut.
Tillitanik pisineq, arsaarinninneq EU-millu allagartaliineq
Jens-Frederik Nielsenip aamma apeqqutigaa, peqquserlussimanermik oqariartuutigineqartoq piviusumik takussutissinneqarsinnaanersoq, peqquserlussimanermik oqariartuutigineqartoq qanoq annertutiginersoq aamma peqquserlussimanerup annertussusaa nalunaarusiami pisinnaatitsissutinut allassimasunut sanillersuunneqarsinnaanersoq. Apeqqutinut taakkununnga tamanut Naalakkersuisoq apeqqummut siullermut innersuussivoq.
Demokraatit siulittaasuannit apeqqut kingulleq KANUAANA-p nakkutilliinermik suliassamik isumaginnissinnaanissaanut inatsisini pisinnaatitsissutit suut amigaataasimanerinut tunngassuteqarpoq.
Tassunga akissut pissutsinut pingasunut tunngassuteqarpoq:
- Pisanut uppernarsaatinik pitsaassusiliinissamut periarfissaq aalisarnermut EU-mit allagartaliinikkut.
- Ilaannakuusumik arsaarinninnissamut periarfissaq, unioqqutitsilluni pisanut taamaallaat tunngassuteqartilerlugit, unioqqutitsinanilu pisanut tunngassuteqartitsinani,
- Tillitanik pisineq pillugu malittarisassat aalisarneq pillugu inatsimmut akerliusumik pisanik tunniussinermut, pisinermut tunisinermullu atatillugu.