Aalisarnermi isumalluutinik atuinermut akitsuut allanngortinniarneqartoq

Akitsuuserinermi maanna atuuttumi aalisakkat pisarineqartut naliinik aalisakkallu atorluarneqarsinnaassusianik appartoortoqarsinnaanera pinngitsoortinniarlugu, Naalakkersuisut inatsimmi allannguutissatut siunnersuuteqarput.

Torsk, fiskekasse

Kalaallit Nunaanni aalisarnermi tamarmi isumalluutinik atuinermut akitsuuseeriaaseq nutaaq 2017-imi ukiakkut saqqummiunneqarpoq. Isumalluutinik atuinermut akitsuutinit inuiaqatigiit unneqqarissumik peqataassuteqarnissaata qulakkeerneqarnissaa, tamatumalu peqatigisaanik periutsimik ersarinnerusumik pisariinnerusumillu atuutsitsilernissaq siunnersuummi siunertarineqarpoq.

Naliusunik appartitseratarsinnaasoq

- Akitsuuseeriaatsilli ulloq 1. januar 2018-imi atuutilersup atuutsinneqalernerata kingorna Naalakkersuisunit paasineqarpoq akitsuuseeriaasissatut akuersissutigineqartoq aalisagaqatigiit ilaat eqqarsaatigalugit naliusunik aalisakkallu atorluarneqarsinnaassusianik appartitseratarsinnaasoq, tamannalu Inatsisartut inatsisaanni siunertaanngilaq, Naalakkersuisut siunnersuummut nassuiaamminni allapput.

Maanna periutsimi akitsuutinut tunngavigineqartoq Naalakkersuisut siunnersuuteqarnerminni allanngortinniarpaat.

- Siusinnerusukkut tunineqartut annertussusiat (tunisassiaq piariigaq) pinnagu aalisarneqartut (’aalisagaq ilivitsuutillugu’) tunineqarneranni akiusoq tunngavigalugu akitsuuteqartitsilluni periutsip allanngortinneqarneratigut tunisinermi agguaqatigiissillugu akiusoq appasinnerusoq anguneqassaaq, taamaalillunilu akitsuutip procentia appasinnerussalluni. Taamaattorli akitsuutit procentiat appasinnerusoq aalisagaqatigiinnik ukuninnga avammut tunisaqarnermut sunniuteqassasoq naatsorsuutigineqarpoq; saarulliit, suluppaakkat, kullerit saarulliusaallu, akerlianillu akitsuutit procentiata raajanut qaleralinnullu annertunerusumik sunniuteqarnissaa naatsorsuutigineqarnani, Naalakkersuisut nassuiaapput.

Saattuanut uiluinnullu akitsuut peerneqassaaq

Aammattaaq saattuanut uiluinnullu akitsuutip noorlumut (0) inissinnissaa siunnersuutigineqarpoq. Tamatumunnga tunngavigineqartoq tassaavoq avataani saattuanik maannakkut aalisartoqanngimmat aammalu aalisarnermut killilimmik ingerlanneqartumut maannakkut akitsuusiinissaq naapertuuttutut isigineqanngimmat.

Uiluinniarnermi akitsuutip peerneqarneratigut 2019-imi naatsorsuutigineqarpoq akitsuutinit tamarmiusunit iluanaarutit 2019-imi 0,5 milliuunit koruuninik annikilleriaateqarfiussasoq ilanngaatissat ilanngaatigereerlugit missingerlugu 0,33 milliuunit koruuniussallutik.

Sinerissamut qanittumi qaleralinniarneq

Sinerissap qanittuani qaleralinniarnerni akitsuutip 5 procentiniit 4 procentimut appartinneqarnissaa ilanngullugu siunnersuutigineqarpoq, tamatumani angallatit tunisassiortut pisat nalinginik qaffariaataasinnaasunik suliareqqiinernik suliaqarsinnaanerisut annertutigisumik sinerissap qanittuani aalisartut suliaqarsinnaannginneri eqqarsaatigalugit.

- Sinerissamut qanittumi qaleralinniarnermit akitsuutinut isertitat 2019-imi missingersuutit 13,1 milliuunit koruuniupput. Akitsuutinut procenti 5 procentimiit 4 procentimut appariaateqartinneqarpat akitsuutinut isertitat missingerlugu 2,6 milliuunit koruuninik annikilleriaateqassaaq. Ilanngaatissat ilanngaatigereerlugit missingerlugu tamanna 1,6 milliuunit koruuniuvoq.

Akitsuutit qummut killiga qaffanneqassaaq

Akitsuutit qummut killissai qaffanneqassasut Naalakkersuisut illuatungaani siunnersuuteqarput, siunnersuutigineqarluni akitsuutit killiga 17,5 procentimiit 17,9 procentinngortinneqassasoq, tamatumani raajanik qaleralinnillu avammut tunisinerni akitsuutinik sunniuteqarnissaa naatsorsuutigineqarluni.

- Akitsuutit qummut killissaanik 17,5 procentimiit 17,9 procentimut qaffariaateqarneq raajanik qaleralinnillu avammut tunisinerni taamaallaat akitsuutinut sunniuteqassaaq. Tamatumani naatsorsuutigineqarpoq missingerlugu 8 milliuunit koruuninik akitsuutinik 2019-imi iluanaaruteqarnerunissaq, ilanngaatissat ilanngaatigereerlugit iluanaarut missingerlugu 5,2 milliuunit koruuniulluni, Naalakkersuisut nassuiaamminni allapput.

Inatsimmut allannguutissatut siunnersuut Inatsisartunit isumaqatigineqarluarpoq, taamaatsillugu pingajussaaneerneqartussatut innersuussutigineqarluni.

Powered by Labrador CMS