Aalisarneq: Kujataani qaleralinniarneq ingerlalluartoq
Ukioq manna Kujataani qaleralinniarneq ingerlalluarpoq, aalisarnerlu uneqattaanngitsumik ingerlassappat ukiumut pisassiissutit maannakkornit amerlanerusariaqartut, Kujataani aalisartut isumaqarput.
Kujataani sinerissap qanittuani qaleralinniarnermik inuussutissarsiuteqartut amerliartorput, taamaattumillu ukiumut pisassiissutigineqartartut maannakkorniit amerlanerusariaqartut, aalisartut isumaqarput.
Taamak allaaserinnippoq aviisi Sermitsiaq.
Aqutsiveqarfik Paamiut aamma Qaqortoq ukioq manna qaleralinnik 420 tonsinik pisassiiffigineqarpoq taakkulu 95 procentii, tassa 401 tonsit, juli qiteqqutiinnartoq aalisarneqareerput. Ukiullu sinnerani aalisakkanik sulissuarni tunisassiornerup qaleralinniarnerullu unigani ingerlaannarnissaa qulakkeerniarlugu, ukiumut pisassiissutit 420 tonsiusut qaavisigut 350 tonsinik, taamaalilluni Kujataani pisassiissutit katillugit 770 tonsinngorlugit, Naalakkersuisut 19. juli ilavaat.
Qaleralittassiissutillu ilaneqarnerat aalisartunit nuannaarutigineqarlunilu toqqissiallaatigineqaraluartoq, pisassiissutit suli amerlanerusariaqartut, Kujataani aalisartut isumaqarput.
Aalisarneq ingerlalluartoq
Kalaallit Nunaanni Aalisarsinnaanermut Akuersissutinik Nakkutilliisoqarfimmi, KANUAANA-mi, sinerissap qanittuani aalisakkat pisarineqarsimasut nalunaarsorsimaffianni paasissutissat naapertorlugit, aqutsiveqarfik Paamiut aamma Qaqortumut qalerallit pisassiissutigineqartut 770 tonsiusut 65 procentii 20. august aalisarneqareersimapput. Ukiullu sinneranut pisassiissutit sinneruttut 271 tonsit naammannissaat neriuutigiinnartariaqaritsik, Narsami aalisartut piniartullu peqatigiiffianni siulittaasoq, aamma KNAPK-mi siulersuisuunernut ilaasortaq, Ole Jørgen Davidsen, oqarpoq.
Piffissami kingullermi aalisarfiusumi kangerlummi Sermilimmi kassorpassuit aniasut ningittagarsorluni aalisarnermut akornutaalersimagaluartut, aasap ingerlanerani Narsap eqqaani qaleralinniarneq iluatsilluartumik ingerlasimasoq, taassuma oqaatigaa.
- Kujataani qaleralinniarneq inuuniutigineqarluarsinnaavoq tamannalu annerusumik ineriartortinneqassappat ukiumut pisassiissutit maannakkornit amerlanerusariaqarput. Ukiorlu manna pisassiissutit nungunnissaat paasinarsippat, tamanna Naalakkersuisut eqqumaffigissagaat neriuutigaarput, Ole Jørgen Davidsen oqarpoq.
Allaaserisaq tamaat aviisimi Sermitsiami atuaruk:
