Aalisarneq: EU-mik isumaqatiginninniarleq aallartippoq
Naalakkersuisut isumaqatiginninniartussanik EU-mut isumaqatigiinniarnernik suliaqartussanik pilersitsereerput
Kalaallit Nunaata EU-llu aalisarneq pillugu isumaqatigiissutaa 2020-p naanerani atorunnaassaaq. Aalisarneq pillugu isumaqatigiissummut tapiliussassaq pillugu isumaqatigiinniarnernut atatillugu illuatungeriit marluullutik kissaatigaat Aalisarnikkut suleqatigiinneq pillugu isumaqatigiissut nutarterneqassasoq, taamaalilluni siunissami isumaqatigiissutissaq 2007-imiilli, isumaqatigiissutip atuuttup atuutilerfigisaaniit, allanngoriartornermut naapertuutilerniassammat.
Namminersorlutik Oqartussat tusagassiutinut nalunaarummi allapput.
- Taamaammat Kalaallit Nunaata EU-llu Aalisarnikkut suleqatigiinneq pillugu isumaqatigiissutissaq aamma taassuma ataani isumaqatigiissummut tapiliussassaq pillugit isumaqatigiinniarnerit januaarip 15-iannit 17-iannut 2020-mi aallartippaat, ilisimatitsissutigineqarpoq.
Isumaqatiginninniartussat Aalisarnermut, Piniarnermut Nunalerinermullu Naalakkersuisoqarfimmit siuttuuffigineqassapput, ukulu peqataateqassapput KANUAANA, Aningaasaqarnermut Naalakkersuisoqarfik, Nunanut Allanut Naalakkersuisoqarfik, KNAPK aamma Sulisitsisut, GE.
EU-mik isumaqatigiissutaasoq maanna atuuttoq decembarip 31-ani atorunnaassaaq.