Aalisarneq pillugu niuffannissaq taamaatinneqarpoq
Coronamut killilersuutit pissutigalugit aalisarnermut piniarnermullu niuffannissaq Ilulissani junimi ingerlanneqartussaagaluartoq taamaatiinnarneqarpoq.
Aalisarneq piniarnerlu pillugit niuffatsitsineq ornigarneqarluartartoq, Ilulissani 15.-17. juni ingerlanneqartussaq ukioq manna taamaatiinnarneqarpoq. Aaqqissuisut Aalborg Kongres & Kultur Center (AKKC) taama nalunaaruteqarput.
Coronamut killilersuutit taamaatitsinermut peqqutaapput.
- Kalaallit Nunaanni oqartussaasut nakorsaaneqarfillu oqaloqatigisarpagut, taakkunanngaaniilli tusartakkagut, tassalu Kalaallit Nunaannukarsinnaanermut killilersuinerit qasukkartinneqarnissaat angerlarsimaannartussaatitaaneq, inuillu katerittarnerannut amerlanerpaaffissanut tunngasut tusartakkagut nuannerpallaanngitsut qiimmaallannarpallaanngitsut pillugit niuffannissaq ingerlassinnaanngilarput, AKKC-mi pisortaq Nicolaj Holm nassuiaavoq.
Aaqqissuussaq nunatsinni nunaniillu tamalaanit peqataaffigineqartarpoq, peqataasut 1800-t sinneqarsinnaasarlutik. Nunat Island, Norge, Savalimmiut, Kalaallit Nunaat aamma Danmark peqataatitaqartarput, taamaammallu angalanermut katersuunnermullu killilersuutit atuuttut atuutsillugit aaqqissuussaq piviusunngortikkuminaassalluni.
Aappaagu aaqqissuusseqqissapput
Niuffanneq aatsaat taamaatiinnarneqalinngilaq. Niuffannissaq arlaleriarluni kinguartinneqartareerluni siorna aamma taamaatiinnarneqarpoq, corona pillugu killilersuutit sukanganeri pissutigalugit.
Niuffannerup ornigarneqarluartartup aappaagumut aaqqissuunnissaa aaqqissuisut maanna isumagilerpaat.
- Ukiaq 2022-mut qilanaarpugut, Ilulissanilu aaqqissuusseqqinnissamut piareersimalluta, Nicolaj Holm oqarpoq.
PolarExpo / FISHING & HUNTING, niuffannerup ukiakkut 2022-mi ullut sorliit aaqqissuunneqassanersoq suli aalajangerneqanngilaq. Ulluliinissaq pillugu Avannaata Kommunia suleqatigineqarpoq.