Aalisarneq pillugu niuffannerit apriilimi ingerlanneqassapput

Aalisarneq pillugu niuffannerit marluk aappaagu ingerlanneqassapput. Piniarneq aalisarnerlu pillugit niuffannissaagaluaq Ilulissani ukioq manna oktobarip qaammataani ingerlanneqartussaagaluartoq aappaagumut aprilimi pisussanngorlugu kinguartinneqarsimavoq.

Piniarneq aalisarnerlu pillugit niuffannissaagaluaq Ilulissani ukioq manna oktobarip qaammataani ingerlanneqartussaagaluartoq aappaagumut aprilimi pisussanngorlugu aningaasaqarnermut ataatsimiititaliap innersuussutaa Avannaata Kommuniani kommunalbestyrelsimit akuersissutigineqarpoq. Taamaalilluni aalisarneq pillugu niuffannissat marluk aappaagu pisussanngorput.

Tamanna kommunip nittartagaani atuarneqarsinnaavoq.

- Pingaaruteqarpoq pingaartumik nunatsinni aalisartut aalisarnermi atortorissaarutitigut, umiatsiatigut assigisaatigullu ineriartortoqarneranut malinnaasinnaanissaat, taamaammat piniarneq aalisarnerlu pillugit niuffannissaq pilersaarutaareersoq taamaatinnagu aappaagumut pisussanngorlugu kinguartinneqarpoq. Taamaasilluni aalisarneq pillugu niuffannerit marluk aappaagu pisussanngussapput, aappaa nunatsinni allalu Aalborgimi, Palle Jerimiassen Avannaata Kommuniani borgmesteri kommunalbestyrelsip aggustip 20-ani ataatsimiinnerani oqarpoq.

Niuffannissaq oktobarip qaammataani Ilulissani ingerlanneqartussaagaluarpoq, coronalli killilersuinera pissutigalugu kinguartinneqarsimalluni.

Upernaaq ulapaarfiusussaq

Piniarneq aalisarnerlu pillugit niuffannissap oktobarip qaammataani ingerlanneqartussaagaluartup aappaagu apriilimi pisussanngorlugu aningaasaqarnermut ataatsimiititaliap kinguartitsinissamik siunnersuuteqarnera kommunalbestyrelsimi aalajangernermut tunngaviuvoq.

- Piniarneq aalisarnerlu pillugit niuffannissaq upernaaru pisussanngorlugu ulluliinerit aningaasaqarnermut ataatsimiititaliamit apeqquserneqarsimagaluarput. Taamaasineranimi kommunimut qinersisoqartussaammat kommunimi sulisut qinersereernerup kingorna ulapputeqartussaapput, piffissamilu tassani aamma påskimi nalliuttut pisussaallutik. Taamaakkaluartorli pilersaarusiortussat pisussanik piareersaasiorsinnaaniassammata piniarneq aalisarnerlu pillugit niuffannissap ullui aalajangiusimaneqarput, kommuni ilisamtitsivoq.

En million koruuningajalluinnaat

Taamaasilluni piniarneq aalisarnerlu pillugit niuffannissaq apriilip 13-ianiit 15-iata tungaanut ingerlanneqartussanngorpoq, allalu Danfish International oktobarip 13-ianiit 15-iata tungaanut Aalborgimi ingerlanneqartussanngorluni.

Avannaata Kommunia piniarneq aalisarnerlu pillugit niuffattoqarnissaanut 850.000 koruuninik atuereerpoq, taakkunannga 550.000 koruunit tupersuarmik saqqummersitsivissamik pisinermut atorneqarsimallutik 300.000 koruunillu suliniummik ataqatigiissaarisumut akissarsiaritinneqarsimallutik.

Powered by Labrador CMS