Aalisarneq pillugu nalunaarut assortuussutaasoq allanngortinneqassaaq

Alisarnermut Piniarnermullu Naalakkersuisup aalisarnermik inuussutissarsiuteqartut soqutigisaqaqatigiillu ataatsimeeqatigereerlugit aalajangersimavoq, aalisarnermik nakkutilliineq pillugu nalunarusiaq allanngorteqqinneqassasoq. Tamannali pillugu suli isornartorsiuisoqarpoq.

Aalisarnermik nakkutilliineq pillugu nalunaarut aalisartut aalisarnermillu inuussutissarsiuteqartut akornanni oqallisaangaatsiarsimavoq. Nalunaarut siorna juunip qaammataani akuerineqarpoq. Isornartorsiuisoqangaatsiareersoq, Namminersorlutik Oqartussat ukioq manna juulip qaammataani arlalinnik allannguipput. Allanguut aamma tigulluarneqarpallaanngilaq, susassaqartut isumaqarmata allannguutit annikippallaarlutillu ersernerluttuusut.

Nalunaarutissarlu nutaaq saqqummiunneqarmat isornatorsiuineq ingerlaannarluni.

- Ajoraluartumik allannguisoqalaaginnarsimasoq paasivarput aamma ilaatigut inatsisitigut innarlitsaalisaanermut tunngatillugu ernummatigisimasavut isumagineqarsimanngillat. Ilaatigut isumaqarpugut, KANUAANA-mit annertusisamik nakkutilliisoqarnissaanik kissaateqartoqarneranut atatillugu inatsisitigut tunngavigineqarniartut ajornartorsiutaasut, soorlu aamma isumaqartugut paasissutissat pissarsiarerusunneqartut annertuallaartut, minnerunngitsumik sumut atorneqarniarnersut aamma suna siunertarineqarnersoq sumullu illersuutaaniarnersut ersernerlunnerat pissutigalugu, Kalaallit Nunaanni Sulitsisut pisortaanerat Christian Keldsen Sermitsiaq.AG-mut oqarpoq.

Oqaloqatigiilluarsimasut - angusaq kusanarpallaanngitsoq

Sulisitsisunit angusaq naammagineqanngikkaluartoq, pisortaanerup oqaatigaa suliarineqarsimasoq ajunngitsuusoq.

- Ataatsimut isigalugit isumaqarpunga, aalisarnermi naalakkersuisut naalakkersuisoqarfillu tigussaasumik ataqqeqatigiillunilu oqaloqatigineqarsimasut, aamma nalunaarut pillugu suliaq arlalitsigut isornartoqartikkaluarlugu.

Taassuma erseqqissaassutigaa, susassaqartunit nakkutilliisoqartarnissaa ajornartorsiutigineqanngitsoq.

- Nakkutilliisoqartarnissaa tikilluaqquarput, nunamimi maani avataanilu aalisartarnitta pitsaassusaanik qulakkeerinneqataasarmat. Tatigisaajunnaarsinneqarniarnerpulli imaluunniit inatsit tunngaviusoq naapertorlugu pisinnaatitaaffinnut atorfeqarnermilu tunngaviit nalunaarut malillugu allassimasut nuannarinngilavut.

Aalisarnermik nakkutilliineq pillugu Namminersorlutik Oqartussat nalunaarutaata nr. 23, 22. juni 2021-meersup allannguutaa 2023-mi januaarip aallaqqaataani atuutilissaaq.

Nalunaarummut uku allannguutaapput:

  • IUU-mik aalisarnerit maanna erseqqissumik nassuiarneqarput, IUU isumaqarpoq inerteqqutaasumik, nalunaarutitaqanngitsumik aalajangersagaanngitsumillu aalisarneq.
  • Angallammi nammineq tunisassiorneq nassuiaaserneqarpoq.
  • Angallatit 15 meterit sinnerlugit takissusillit pillugit piumasaqaat peerneqarpoq.
  • Alisartut pisamik allannguutaannik nalunaaruteqartassapput kingusinnerpaamik aalisarnerup aqanguani nal. 12:00 UTC.
  • Ilanngussaq nakkutilliinermi periuserineqartussanik nassuiaatitalik suliarineqarsimavoq.
  • Pisassiissutinik ilanngaassisarneq ersarissarneqarpoq. Angallatit tamakkiisumik, 100 pct., tunisisussaatitaasut tulaassaat tamakkiisut malillugit pisassiissutinik ilanngaaffigineqartarnerat ersarissarneqarpoq, akerlianik angallatit ilaannakortumik tunisisinnaatitaasut imaluunniit tunisisinnaatitaanngitsut pisassiissutaat logbogi malillugu ilanngarneqartarput.
Powered by Labrador CMS