Aalisarneq pillugu inatsimmi nutaami perulluliortoqarnissaa IA-p pinngitsoorusuppaa
Illuatungiliuttutut inissisimalluni nuanninngilaq. IA-mi siulittaasup Múte B. Egedep tusagassiuutinut nalunaarutaani tamanna malugineqarsinnaavoq, taanna aalisarnermut politikkimut tunngatillugu politikkikkut siammasissumik isumaqatigiissusiortoqarnissaanik ujartuivoq, suliaqarfimmi tassani siunissami akerleriittoqarnera pinngitsoortinneqarniassammat.
Naalakkersuisoqatigiinni partiit siuttui Demokraatit siulittaasuat Niels Thomsen peqatigalugu aalisarneq pillugu ataatsimiititaliarsuarmik ataatsimoorfissarsiorniarlutik Ilulissanukarneranni, IA-p, Partii Naleqqap aamma Suleqatigiissitsisut siulittaasui Nuummiipput.
Taamatut pisoqarnera Múte B. Egedep naammaginngilluinnarpaa.
- Inuit Ataqatigiit isumaqatiginninniarnissamut suleqatigiinnissamullu piareersimagatta aalisarneq pillugu apeqqummi illuatungiliuttoqatigut allat aamma ilaatillugit isumaqatiginniarneqarfigineqarnissarput ujartorpara. Inuit aallartitaattut apeqqummi nunatsinnut aaliangiisuulluinnartumi siammasissumik tunngavilimmik siunnissaq pilersinneqartariaqarpoq. Aalisarneq tamatsinnut tunngavoq, tamatta suleqatigiissutigissavarput, IA-mi siulittaasoq taama isumaqarpoq, taanna tusagassiuutinut nalunaarut aqqutigalugu Naalakkersuisunut piumasaqarpoq.
Isumaqatigiissut attanneqarsinnaasoq
Partiit akimorlugit aalisarneq pillugu isumaqatigiissuteqartoqarnissaa qitiulluinnartoq qulakkeerneqartariaqartoq, taanna isumaqarpoq.
- Aalisarnikkut piorsaaneq siunissaq isigalugu tamatsinnut pitsaasumik sunniuteqarnissaa qulakkeerumallugu qinigaaffiit akimorlugit kikkullu naalakkersuinikkut siuttuunerat apeqqutaatinnagu, IA-mi siulittaasoq naqissusiivoq.
Pisuussutivut ataasimoorluta pigisavut aporaassutaasussamik isumaqatigiissusorfiussannngillat, taanna oqarpoq.