Skip to main content

Aalisarneq pillugu Ataatsimiititaliarsuup paggatassiisoqartarnera atorunnaarseqqugaa

Aalisarnermi tamani umiatsiaararsortunut ataasiakkaanut pisassiisoqartalissaaq, aamma sineriammut qanittumi qaleralinniarnissamut saarullinniarnissamullu nutaanik akuersissuteqaqqittoqassanngilaq. Aamma avataasiorluni raajarniarnermi akitsuut qaffanneqassanersoq misissorneqassaaq, pisassiissuteqarnissamullu piumasaqaateqartoqartalerlunilu piffissami aalajangersimasumi pisassiissuteqartoqartalissaaq.

Aalisarneq pillugu Ataatsimiititaliarsuup inaarutaasumik isumaliutissiissutini politikkerinut innuttaasunullu sisamanngormat saqqummiuppai. Isumaliutissiissut ilaatigut aalisarneq pillugu inatisissamut nutaamut tunngaviliiissaaq nunamilu inuussutissarsiutip pingaarnerpaap ukiuni aggersuni ineriartortinneqarnissaanut atorneqassalluni.

Ataatsimiititaliarsuup inassuteqaatai nungusaataanngitsumik aalisarnermit siunissami ungasissumi inuiaqatigiit aningaasaqarnikkut annertunerpaamik pissarsinissaat anguniarlugu suliarineqarsimapput. Tassa inuiaqatigiit piffissaq ungasinnerusoq eqqarsaatigalugu aalisarnermit sapinngisamik annertunerpaamik pissarsisarnissaat anguniarlugu.

Aalisarnerit ilaat ullumikkut ajunngilluinnartumik ingerlapput, allalli ajutooriaannaallutik, tamannalu ukiuni kingullerni arlaleriarluni sammineqartarsimavoq.

Killiffiup ingerlatiinnarnissaa periarfissaanngitsoq

Suliffissaqartitsinikkut aningaasaqarnikkullu annertusisamik aalisarfiusut isumaliutissiissummi immikkoortinneqarput. Aalisarnerit aningaasaqarnikkut annertuumik ingerlatsiviusut pilersitsiviusullu inuiaqatigiinni sunniutilimmik nalittorsaanernilu ima annertutigisumik sunniuteqartigisarput inuiaqatigiit aningaasaqarnerannut pinngitsoortinneqarsinnaanngivillutik.

- Pineqartumilu suliassaqarfimmi sunilluunniit allannguisoqassappat sukumiisumik eqqarsaatigilluakkamik ingerlanneqartariaqassallutik, ataatsimiititaliarsuarmit oqaatigineqarpoq.

Aalisarnerit aningaasaqarnikkut annertuumik pilersitsiviusut ullumikkut tassaapput sinerissap qanittuani avataanilu raajarniarneq uumassusilinnillu aalisagaqatigiinnik avataaniittunik allanik aalisarneq.

Suliffissaqartitsiviulluartut aalisarnerit annertuumik aalisapiluffiupput, aalisarsinnaassutsillu annertusineqassappat pisuussutinik kingunerluuteqarsinnaaneri navialaffiorujussuarsinnaavoq. Aalisarnerit suliffissaqartitsiviulluartut ullumikkut tassaapput sinerissap qanittuani aalisarnerit, raajanik aalisarfiit minillugit.

- Massakkut killiffigineqartup ingerlatiinnarnissaa periarfissaanngilaq, ataatsimiititaliarsuaq kingullertut pineqartoq pillugu naliliivoq.

Paggatassiisoqartarunnaassasoq

Isumaliutissiissummi pingaarnertut inerniliunneqartut ilagaat, aalisarnermik aqutsinermi aalisarnerni ataasiakkaani atugassarititaasunut immikkuullarissunut naleqqussarlugu inunnut ataasiakkaanut pisassiissutit niuerutigineqarsinnaasut (IOK) tunngavigineqassasut.

Tassa Qeqertarsuup Tunuani, Uummannami Upernavimmilu angallammik 6 meterimit anginerusumik sinerissap qanittuani qalerallit paggatassiissutigineqartarnerat atorunnaarsinneqassaaq.

Tassunga peqatigitillugu pisassiissutit biologit inassuteqaataannut naleqqussarneqarneranni aalisarsinnaanermut akuersissutinik nutaanik tunniussisarneq unitsikkallarneqassasoq inassutigineqarpoq.

Piffissami killilimmi avataasiorluni raajarniartoqartassasoq

Ataatsimiititaliarsuarmit aamma inassutigineqarpoq, avataasiorluni raajarniarnissamut pisassiissutit tunineeqarsinnaasut piffissami aalajangersimasumi atorneqartassasut. Peqatigitillugulu pisassiissutinik atuinissamut piumasaqaatit pisussaaffiillu, atorunnaarsitsinissamik nalunaaruteqartarneq akiliuteqartarnerlu pillugit pisassiissutinik niuerutigineqarsinnaasunik nammineq pigisaqarnissamut piumasaqaatit allanngortinneqassapput.

Isumaliutissiissummi ataatsimiitialiallu sulinerani aningaasaqarnikkut, aalisagaqassutsikkut inuillu atugaasigut piujuartitsinermut iluaqutaasussat tunngavigineqarsimapput.

- Sinerissami qanittumi saarullinniarneq ukiorpassuarni aqunneqarnera sumiiffikkaarnerit, nunap immikkoortukkaarneri nunalu tamakkerlugu suliffissaqartitsinissat annertuumik sunniuteqartillugit ingerlanneqarpoq, tamatumalu kingunerisaanik aalisartorpassuit nutaat saarullinniarnissamik akuersissutinik nutaanik tunineqarsimallutik, ataatsimiititaliarsuaq ilaatigut allappoq. 

Sumiiffinni allani sulisussaaleqinermut iluaqutaasinnaasoq

Sineriammut qanittumi paggatassiilluni qaleralinniartarnerup saarullinniartarnerullu ataasiakkaanut pisassiissuteqarternermut allanngortinneqarnissaanik, TAC-p nungusaataanngitsumik aalisartoqartarnissaanut appartinneqarnissaanik kiisalu ukiuni arlallini aalisarsinnaanermut akuersissutinik nutaanik tunniussisarnerup unitsinneqarnissaanik ataatsimiititaliarsuup inassuteqataai malinneqassappata, aalisartut arlallit suliffissaminnik nutaamik nassaarniartariaqassapput.

Ataatsimiititaliarsuup taamaammat inassutigaa, suliffissaqartitsinermi ilinniartitaanikkullu suliniutigineqartussanut ilanngullugu ikaarsaariarfissamut atatillugu piffissaliinissap immikkut eqqumaffigineqarnissaa qulakkeerniarneqassasoq, tamatumani aalisartut namminerisamik iliuuseqarnermikkut kissaatigisatillu namminneq naapertorlugit aalisarnermit allamut ingerlaqqikkusuttut piviusorsiortunik tigussaasunillu allanik periarfissinneqassallutik. Aalisarnermi suliassaqarfimmi allami suliassaqalernerusinnaavoq, imaluunniit suliassaqarfinni allani sulisussarfiusuni.

Isumaliutissiissummi pingaarnertut inassutigineqartut ilaat:

  • Aqutsinermi politikkikkut akuliutinnginnissamut tunngavik atorneqassasoq
  • Akuersissutinik aqutsisoqarfimmik aamma maalaaruteqarfimmik pilersitsisoqassasoq
  • Avataasiorluni raajarniartartunut ataasiakkaanut piffissami killilimmi tunineqarsinnaasunik pisassiisuteqartoqartalissasoq
  • Sineriammut qanittumi qalerillinniartarneq saarullinniartarnerlu biologit inassuteqaataannut naleqqussarneqassasut
  • Sineriammut qanittumi qaleralinniarnissamut saarullinniarnissamullu akuersissutit nutaat piffissami aalajangersimasumi unitsinneqassasut
  • Sineriammut qanittumi qaleralittassiissutit saarullittassiissutillu niuerutigineqarsinnaasut atuutsinneqalissasut
  • Avataasiorluni raajarniarnermi pisassiissutit qummut 20 procentinik killilerneqassasut, tassani toqqaannanngitsumik piginneqataaneq ilanngullugu
  • Pisassiissutit ukiumut tunineqarsinnaasut/attartortinneqarsinnaasut qummut killilerneqassasut
  • Aningaasaliissuteqaqatigiittartut soraarnerussutiassaqarfiillu aningaasaliissuteqarsinnaanerat ammaanneqassasoq
  • Avaataasiorluni raajarniartartut assigalugit, sineriammut qanittumi raajarnartartartunut ataasiakkaanut niuerutigineqarsinnaasunik pisassiissuteqartoqartalissasoq
  • Avataasiorluni qaleralinniartartunut, suluppaagarniartartunut saarullinniartartunullu ataasiakkaanut niuerutigineqarsinnaasunik pisassiissuteqartoqartalissasoq
OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER