Aalisarneq pillugu Ataatsimiititaliarsuup isumaliutissiissutini sisamanngorpat saqqummiutissavaa
Aalisrneq pillugu Ataatsimiititaliarsuup suliani naammassivaa, sisamanngorpaallu Naalakkersuisunut Inatsisartullu Aalisarneq pillugu Ataatsimiititaliaanut saqqummiutissallugu. Tamatuma kingorna ataatsimiititaliarssup sineriammi innuttaasunik ataatsimiisitsinerit arlallit ingerlatissavai.
Aalisarneq pillugu Ataatsimiititaliarsuup ukiut marluk sinnerlugit isumaliutissiissummik suliaqarnini naammassigamiuk, isumaliutissiissut politikkerinut innuttaasunullu saqqummiuttussanngoraa, Naalakkersuisut tusagassiorfinnut nalunaaruteqarlutik ilisimatitsipput.
Isumaliutissiissut innersuussutinik piviusorsiortunik amerlasuunik imaqarpoq, siunnersuutinik Naalakkersuisut suliakkiutaat tunngavigalugit suliaallutik.
Ataatsimiititaliarsuup sulinermut piffissaliussap qiteqqunnerani killiffitsik saqqummiuppaa, tassani assigiinngitsunik suliaqarsimapput, inaarutaasumik isumaliutissiissummi naammassillugit suliarineqarsimasussanik.
Isumalluutit qanoq agguaanneqassappat
Ilaatigut aqutsinissamut pilersaarutit, aalisapiluttoqannginnissaanik qulakkeerinnittussat, aalisakkatigut isumalluutinik atuineq pillugu ammasumik ingerlatsinissaq aamma paasissutissanik pissarsisarnissaq, aalisakkatigut isumalluutinik piginnittuunerup agguarneqarnera, aamma inuussuttut aalisartut aalisarsinnaanerisa qanoq qulakkeerneqassanersoq sammineqarsimapput.
Aalisarneq pillugu Ataatsimiititaliarsuaq Naalakkersuisuusimasunit marsip 8-anni 2019-imi pilersinneqarpoq. Ataatsimiititaliarsuup sulinerani siunertaq pingaarnerpaaq tassaavoq Aalisarneq pillugu Ataatsimiititaliarsuup aalisarneq pillugu inatsisissamut suliniutissanullu tassunga atasunut allanut aalisarnerup ineriartornissaanut periarfissanut pitsaasumik tapersiisinnaasunik inuiaqatigiillu aalisarnermik pisuussutinillu annertunerpaamik iluaquteqarnissaannut qulakkeerinneqataasinnaasunik inassuteqarnissaa.
Aalisarneq pillugu Ataatsimiititaliarsuaq suliani pillugu saqqummiussisassaaq innuttaasunillu ataatsimiitsitsisassalluni, innuttaasunit allanillu soqutiginnittunit peqataaffigineqarsinnaasunik.
Innuttaasunik ataatsimiisitsinerit:
Nuuk sisamanngorneq, 23. september nal. 19.00 - 21.00, Nuup katersortarfiani.
Maniitsoq tallimanngorneq, 24. september 2021, nal. 13.00 – 16.00 Maniitsup katersortarfiani.
Ilulissat arfininngorneq, 25. september 2021 nal. 13.00 – 16.00, Ilulissani Kulturikkut Illorsuarmi Sermermiuni.
Innuttaasut sisamanngornermi septembarip 23-anni ataatsimeeqataasinnaanngitsut toqqaannartumik live-kkut nalunaaqutaq 15.00-17.00 malinnaasinnaapput. Toqqaannartumik live-kkut Naalakkersuisut facebookiatigut; ugguuna malinnaasuupput: https://www.facebook.com/naalakkersuisut.