Aalisarneq pillugu Ataatsimiititaliarsuaq: Aalisapiluttoqarunnaassaaq

Kalaallit Nunaanni inuussutissarsiutit pingaarnersaannut siunissami sinaakkutissat piujuartitsinermik paasiuminassuseqarnermillu tunngaveqassapput, aalisartut inuiaqatigiillu sapinngissamik annerpaamik pissarsiaqarsinnaaqqullugit. Aalisarneq pillugu Ataatsimiititaliarsuaq oqallissisiaminik sisamanngornermi saqqummiussimmat oqariartuutigineqartorpassuit tamanna ilagaat

Aalisarneq pillugu Ataatsimiititaliarsuarmut ilaasortat oqallisissiap saqqummiunneqarnerani najuuttut.

”Aalisagaativut – Atugarissaarnerput” oqallisissiaq Aalisarneq pillugu Ataatsimiititaliarsuarmit sisamanngornermi politikerinut, tusagassiortunut innuttaasunullu saqqummiunneqartoq taama qulequtaqarpoq.

Ataatsimiititaliarsuaq aalisarneq pillugu inatsisissamut siunnersuutaasussamik suli naammassisaqaqqajanngilaq, kisianni isumaliutissiissummik inatsisissamullu missingiummik juunimi 2020-mi saqqummiussinissaq anguniagaavoq.

Aqutsinissamut pilersaarutit

Ataatsmiititaliarsuaq qitiulluinnartumik aqutsinissamut pilersaarutit eqqunneqarnissaannik suliaqarpoq, taakkualu aalisapiluttoqannginnissanik qulakkeerinnissapput, aalisartut ataasiakkaat suliaminnik inuussuteqarsinnaaqqullugit, inuiaqatigiillu akileraarutinit akitsuutinillu isertitanik, nunami atugarissaarnermut “piffissami killiligaanngitsumi” atugarissaarnermut aningaasalersueqataasussanik, naatsorsuutiginnissinnaaqqullugit.

Qitiulluinnartoq alla tassaavoq inuiaqatigiit aalisakkanik pisuussutinik iluaqutiginninneq pillugu paasissutissanik attuumassuteqartunik pissarsisinnaanissaat, taamaaliluni pineqartumi ineriartortitsinermut atatillugu paasiuminassuseq atuussinnaaqqullugu.

Diamanti

Piginnaasat qitiusumiittut sisamat, aalisarnermut politikkimi diamantitut taaneqartut, saqqummiunneqarput, diamantilu siunissaq ungasinnerusoq eqqarsaatigalugu aalisarnermit aningaasatigut iluanaarutit qaffasinnerulersinnaanissaannik qulakkeerinnissaaq.

  • Pisinnaatitaaneq eqqarsaatigalugu immikkuullarissuuneq, tassa imaappoq aalisartoq pisassiissutinik kisimiilluni pisarisassaminut pisinnaatitaaffeqarpoq.
  • Pisinnaatitaaffik pillugu qularnaarinninneq, tassa imaappoq aalisartup pisassaasa ilai allanut agguaanneqarsinnaanngillat.
  • Pisinnaatitaaffiup sivisussusia, tassa imaappoq aalisartup pisassani qanoq sivisutigisumik pigissanerlugit ilisimassavaa.
  • Pisinnaatitaaffimmik nuussisinnaaneq, tassa imaappoq pisinnaatitaaffimmik tunniussisinnaanermut tunisisinnaanermulluunniit pisinnaatitaaffiup annertussusia, tassami imaappoq pisassiissutit imaluunniit pisassat ilaannik pisisinnaanermi tunisisinnaanermilu killiliussat qanoq annertutiginerat.

Suliami pisariusumi ataatsimiititaliarsuup aallartissimasaani ataatsimiinnermi tullermi aalisartut inuusuttut nutaat qanoq pilersitsisinnaanerannik qulakkeerinninnissaq eqqartorneqassaaq. Tassami aalisartorpassuaqarpoq utoqqasaanngorsimasunik, ukiualuit qaangiuppata inuussutissarsiorunnaartussanik.

Aalisakkanik pisuussutinut piginnittuunerup qanoq siammarneqarsinnaanera pillugu siunnersuuteqartoqanngilaq. Ataatsimiititaliarsuulli unammilligassarpassuit sinerissamut qanittumi avataasiorlunilu aalisarnermi atuuttut suussusersisimavai.

Assersuutigalugu sinerissap qanittuani aalisartut amerlavallaarput, taakkualu isumalluutinik tatisillutik tamatumalu peqatigisaanik isertitakillutik. Avataasiortunullu atatillugu isertitaqarluartoqaraluarpoq, kisianni aalisarneq assannut ikittuinnarnut eqiterneqarsimavoq, ingerlatsisunullu nutaanut iserniarnissaq ajornakusoorluni.

Sammisassat qitiusumi inissisimasut

Aalisarneq pillugu Ataatsimiititaliarsuaq sammisassanik qitiusumi inissisimasunik, sulissutigeqqinneqartussanik, suussusersiisimavoq:

  • Piviusumik piujuartitsinermik tunngaveqartumik iluaquteqarneq
  • Aalisakkanut assigiinngitsunut tamanut pisassiissutissanik agguaanissamut siunissamut ungasinnerusumut inatsisitigut aalajangersarneqartunik killiliussassanik ilusilersuineq, akuliuttussaannginnermut periuseq ataqqillugu ingerlanneqartariaqartoq.
  • Piginnittuunermut pisassiissutinullu pissutsit pillugit apeqqutini piviusumik akunnattoorutaasut uppernarsarneri. Ataatsimiititaliarsuarmiit siunnersuutinut assigiinngitsunut naleqqiullugu kingunissanik misissueqqissaarneq.
  • Tassunga atatillugu “ingerlataqartussat nutaat annertunerusumik periarfissinneqarpata piginnittullu siaruartinneqarpata tamanna piviusumik qanoq isumaqarnersoq erseqqinnerusumik misissorneqassaaq”.

- Tassani aalisarnermi ingerlataqartussat (immikkoortut) nutaat amerlanerulernissaat pillugu anguniagaq imaluunniit piginnittuunerup assannut amerlanernut siaruartinneqarnissaa pineqarnersoq immikkoortinneqarnissaa pingaarpoq, Jens Paulsenip siulittaasullu tulliata Peder Andersenip saqqummiussineranni oqaatigineqarpoq.

Powered by Labrador CMS