Skip to main content

Aalisarneq navianartoq: Aalisartut Karl Lyberth avoqqaaraat

Aalisartut tusarniaqqaarnagit aalisarnermut politikkit allanngortinneqartartoq unnerlugu, aalisartut piniartullu kattuffiat KNAPK isornartorsiuivoq

Umiatsiaararsortut qaleralittassatik Qeqertarsuup tunuani tamakkeramikkit misileraalluni aalisartinneqalerput sumiiffimmi umiatsiaararsortut inuunerminnik ulorianartorsiortitsiffigisinnaasaannik. Isornartorsiuisut tassapput KNAPK-meersut aalisarnermut naalakkersuisoq Karl Lyberth marloriarluni aalisarneq pillugu aalajangiisareersoq aalisartut tusarniaqqaarnagit.

Atuaruk: Immikkut pisassiineq umiatsiaararsortunut navianarpallaarpoq

Naalakkersuisut siuliisa aalisarnermut politikkiannik isornartorsiuisut salliit Karl Lyberth ilagaat. Taamaammat kvartalikkaartumik pisassiisarnermik atorunnaarsitsivoq, mannalu tassa Qeqertarsuup tunuani umiatsiaararsortut qaleralittassatik tamakkereerpaat.

Atuaruk: Septembarimit atuutilersumik misileraalluni qaleralittassiisoqarpoq

- Ukioq aalisarfigineqarluni aallartilluaannartoq kvartalikkaartumik pisassiisarnerup atorunnaarsinneqarnera kattuffiup ilaasortaanut assorsuaq paatsuungatitsilerpoq. Maannakkullu qaleralittassaarutereernermik kingumut tassa kinguneqarluni, KNAPK-mi siulittaasuugallartoq Leif Fontaine oqarpoq.

Naviarnarluinnarpoq

Aalisartut kissaatigisimagaluarpaat allannguisoqassatillugu KNAPKp isumasiorneqaqqaarsimanissaa. Tassami suleqatigiissitami KNAPK peqataasimavoq tassanilu inassutigineqarsimavoq kvartalikkaartumik pisassiisoqartalissasoq ukioq tamaat aalisarlunilu tunisassiortoqarsinnaanissaa qulakkeerniarlugu.

KNAPK-lli tupaallaatiginngilaa misileraalluni aalisarnermik taallugu 700 tons-inik Karl Lyberthip pisassiinera.

- Tusarniaaffigineqaqqaarsimannginnerput tupaallaatigivallaanngilarput, tassami Naalakkersuisup aalisartut taakkualu kattuffii paasiniaaffigeqqaarnagit tusarniaaffigeqqaarnagillu aalajangiisarnera maannakkut kikkut tamarmik ilisimaarilluarmassuk, Leif Fontaine oqarpoq.

- Tupaallaatigeqaarpulli Naalakkersuisup taamak aalisartunut kusanaatsigisumik pissusilersornera, tassami nammineq inuttut umiatsiaararsornikuusutut Hr. Karl Lyberth-ip nalunngilluinnarmagu piffissami misileraaffissatut aalisartunut neqeroorutimini; qaammatit atortinniagai aammalu sumiiffiit aalisarfigalugit misileraaffigitinniagai, aalisartunut inuunermik navianartorsiortitsiffiusinnaammata, Leif Fontaine oqarpoq.

Naalakkersuisut ilisimatitsissutigereerpaat aalisarnermut inatsisip allannguutissai upernaamut Inatsisartuni oqaluuserineqassasut. KNAPKp Karl Lyberth kajumissaarpaa upernaamut Inatsisartut katersornissaat sioqqullugu aalisartunik isumasioqatigiissitsequllugu. Leif Fontainep siunnersuutigaa isumasioqatigiinneq aalisakkanut assigiinngitsunut agguataarneqassasoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER