Skip to main content

Aalisarneq immikkut pineqarpallaaqaaq

Aallartitsisup isornartorsiorpaa aalisarneq tapiiffigineqarnissamut pitsaanerpaanik atugassaqartinneqarmat, inuussutissarsiutit siammasissuunissaat Naalakkersuisut kissaatigigaluaraat

Aalisarnermik ingerlatsivimmik aallartitserusukkaanni, nammineq umiatsiaarartaarluni imaluunniit tunitsivimmik pilersitsiniarluni, taava pisortanit tapiiffigineqarnissamut arlalinnik periarfissaqarpoq.

Inuussutissarsiutinit allanit tapiiffigineqarnissamut aaqqissuussinerit amerlanerusut, tamannalu aallartitsisup Dorit Olsenip uggornartippaa.

Taanna nammineq ilusilersuisartuuvoq Nuummi eqqumiitsulianik sannavimmini Dorit Design, qaammammut innaallagissamut aningaasartuuteqartartorujussuulluni, Nukissiorfinniillu inuussutissarsiortutut innaallagissamut akikilliliivigineqarsinnaanngilaq, innaallagissamik pilersuinermik selskabi namminersorlutik oqartussanit pigineqartoq nunami inuussutissarsiutit annersaannut, aalisarnermut, akikilliliissutinik annertoorujussuarnik neqerooruteqartaraluartoq.

Taamatut allappoq inuussutissarsiortunut atuagassiaq Una Business.

Tapiiffigineqarneq ajortut

– Eqqumeeqqaaq aalisarnermik ingerlatsisut kisimik immikkut ittumik pineqartarnerat. Inuussutissarsiutimmi allat innaallagissamik atuisorujussuit? Dorit Olsen Una Businessimut oqarpoq.

Taassuma uggornartoqartippaa inuussutissarsiutini allani aalisarnerunngitsumi namminersortut aningaasartuutiminnut tapiiffigineqarsinnaanngimmata.

Sannavimmi eqqumiitsuliortoq qaammatit tamaasa innaallagissamut Nukissiorfinnut 2.000 koruunit missaannik akiliuteqartaarpoq.

Immaqa akit nutaat

Dorit Olsen eqqumiitsuliornermik ingerlatsinani aalisarnermik ingerlatsiveqartuuguni Atuisartunut akiliut 2-mik taaneqartartumut, appasinnerujussuarmut, akiliisassagaluarpoq. Taannalu innaallagissamut kisimi atuutinngilaq, aammattaarli selskabit Nukissiorfimmut imermut kiassarnermullu akiliutaannut.

Naalakkersuisut nunamilu politikerit allat oqaatigigajuttarpaat Kalaallit Nunaat uummaarissumik inuussutissarsiuteqartariaqartoq, aalisarnerinnaq pinnagu siuariartorfiusinnaasunik. Immaqalu akinut tunngatillugu allanngortitsisoqassaaq.

Tassami Pinngortitamut, Avatangiisinut Inatsisinullu Naalakkersuisoqarfik Una Businessimut oqarpoq qulaajaalluni sulineq aallartinniarlugu, Nukissiorfinni akinik nutaanik kinguneqarsinnaasumik.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER