ajunaarnersuaq
Aalisarneq aallarteqqippoq - kisianni sulisunik amigaateqartoqarpoq
Royal Greenlandip Uummannami nunaqarfiinilu tunisineq ippassaq sisamanngornermi ammaqqippaa. Aalisartut maanna ulluinnarnut uteqqikkiartorusaalerput.
Uummannap sulluani arfininngormat ajunaarnersuaqallarnerata kingorna, sillimaniarneq pissutigalugu Royal Greenlandip tunisassiorfii matuneqarallarput.
Kisianni Uummannami aamma nunaqarfinni sisamanngornermi aalisakkanik tunisineq ammaqqinneqarpoq.
- Qaqqap sisoornerata kingorna piniarneq aalisarnerlu unipput, maanna kisianni aallarteqqippugut, Egede Jonathansen Ikerasammeersoq oqarpoq.
Atuaruk: Royal Greenlandip Uummannami nunaqarfiinilu tunisineq ammaqqippaa
Taamaattorli tamakkiisumik suli sulisoqalinngitsoq, taanna oqaluttuarpoq.
- Tassami tunisisassiorfinni sulisut ilaat ajunaarnersuarmit sakkortuumik eqqorneqarput, taakkulu suli toqqissisimanatillu ulluni kingullerni amerlasuuni iluamik sininngillat. Sisoortoqarnissaanut suli sillimaniarpugut, sukkasuumik qisuariartariaqassagatta, Egede Jonathansen oqaluttuarpoq.
Uummannami aalisarneq aamma aallarteqqippoq, kisianni puisinniarneq maanna unittooqqavoq, Hans Tobiassen Uummannameersoq oqarpoq.
- Puiserpassuit kangerlummukartarput, ukiup taamaalineranilu piniartut Nuugaatsiap tungaanukarnerusarput. Kisianni sumiiffimmi taama pisoqartillugu puisinniarneq uninngavoq, Hans Tobiassen oqaluttuarpoq.
Uummannami aalisarneq aallarteqqippoq, taanna ilisimatitsivoq.
- Aalisartut arlallit aalisariarnikuupput. Kisianni Royal Greenlandimi sulisut sisoortoqarnissaanut ernumasut arlallit Uummannaq qimannikuuaat, taamaalilluni tunisassiorfimmut tunisisinnaaneq killeqarpoq, Hans Tobiassen oqarpoq.
Atuaruk: Orniguteqqaartoq: - Aatsaat taama annilaarnartigisumik takuvunga